Дзæуджыхъæуы æнтыстджынæй цæуы дарддæр фестиваль «Вахтангов. Фыдыуæзæгмæ фæндагыл». Ныр та ирыстойнаг театрдзаутæ базонгæ сты Ярославлæй уазджыты курдиат æмæ сфæлдыстадимæ.
Уæрæсейы рагондæр театртæй иу – Федор Волковы номыл Ярославлы театр Цæгат Ирыстоны академион Ирон театры сценæйыл знон равдыста спектакль «От Некрасова до Некрасова». Сæвæрдтой йæ фондз азы размæ зындгонд поэт Николай Некрасовы райгуырды 200 азы бонмæ. Уæдæй абонмæ спектакль ссис сæ репертуары хуыздæртæй иу, æмæ йæ æнтыстджынæй æвдисынц сæхи театры сценæйыл, стæй, уазæгуаты кæдæм ацæуынц, уыцы горæтты дæр.
Спектакль арæзт у поэты уацмыстыл, æмæ йын йе ‘мдзæвгæтæ канд дзургæ нæ кæнынц, фæлæ заргæ дæр, ома, театры артисттæ æрмæст театралон артисттæ не сты, фæлæ ма се ‘ппæт дæр – рæсугъд хъæлæсты хицау. Уырыссаг фолк-рокмæ хæстæг диссаджы музыкæ ныффыста композитор Игорь Есипович. Æмæ театрдзаумæ афтæ кæсы, цыма хъусынц хуымæтæг æмдзæвгæ нæ, фæлæ, æмбал кæмæн нæй, Некрасовы уыцы поэзийы мелоди.
Спектаклы архайынц театры артисттæн се ‘мбис. Сæйраг ролы хъазы Уæрæсейы сгуыхт артист Николай Зуборенко. Некрасовы уый æвдисы, алчидæр нæ гыццылæй фæстæмæ цавæр Некрасовы зоны, уыцы хуызы. Фæлæ уыцы «зонгæ» Некрасовæн йæ фарсмæ театрдзау спектаклæн йæ райдайæнæй йæ кæронмæ уындзæн, кæй «нæ зоны», ахæм Некрасовы дæр. Театрдзау базонгæ уыдзæн Некрасов – æнахъом сывæллонимæ, Некрасов – студентимæ, журналистимæ, журнал рауадзæгимæ, къамæй хъазæгимæ, помещикимæ… Артисттæ иу иннæйы фæстæ поэты цард æмæ сфæлдыстад сыфгай рафæлдахдзысты, Некрасовы æмдзæвгæтæ кæсгæйæ æмæ заргæйæ.
Спектакль хъæздыг у, артисттæ бирæгæйттæй кæм хъазынц, ахæм рæсугъд сценæтæ æмæ кæфтытæй, сæ æвæрæг – хореограф Еленæ Соболева-Пугачева.
Спектакль сæвæрдта театры аивадон разамонæг, Уæрæсейы адæмон артист, режиссер Валерий Кириллов. Либретто йæм ныффыста Олег Грисевич.
Спектакль куы фæци æмæ йын дзæуджыхъæуккаг театруарзджытæ тыхджын къухæмдзæгъд куы сарæзтой, уæд уый фæстæ сценæмæ рацыдысты фестиваль саразæг, Вахтанговы номыл Мæскуыйы Паддзахадон академион театры директор Кирилл Крок, стæй нæ республикæйы культурæйы министры хæдивæг Рæмонты Маринæ æмæ уазæг артисттæн стыр арфæ ракодтой. Кирилл Крок та сын балæвар кодта фестивалы приз – Мæскуыйы Вахтанговы номыл театры раз чи ис, Евгенийы Вахтанговы уыцы цыртдзæвæны чысыл къопи.
Ярославлы театрæн бындур æвæрд æрцыд 1750 азы. Йæ бындурæвæрæг уыд Федор Волков. Ацы ран се сфæлдыстадон цард райдыдтой зындгонд уырыссаг артисттæ – Полина Стрепетова, Иван Москвин, Леонид Собинов æмæ иннæтæ. Театр нымад у фыццаг уырыссаг профессионалон театрыл. Абон та у, чысыл горæты чи ис, афтæмæй федералон нысаниуæг кæмæн ис, иунæг ахæм театр.
ДЕДЕГКАТЫ Зæлинæ
