Æрвылаз июлы дыккаг хуыцаубоны нæ бæстæйы фæбæрæг кæнынц Уæрæсейы посты бон. Снысан æй кодтой 1994 азы. Абон федералон посты хайæдтæ, традицион лæггæдтæ – газеттæ æмæ журналтæ байуарынæй уæлдай, кæнынц бирæ æндæр куыстытæ. Уæрæсейы регионты кусы 38 мин посты хайады, æфсæнвæндæгтыл згъорынц посты сæрмагонд 800 вагоны, уыимæ, кусынц 18 мин машинæйы, постæн лæггад кæны уæлдæфон транспорт дæр. Афæдзмæ Уæрæсейы посты специалисттæ сæ бафысджытæм фæхæццæ кæнынц 26 миллиард писмойæ фылдæр, 400 милуан æрвитæггаджы æмæ 500 милуанæй фылдæр газеттæ æмæ журналтæ.
«Уæрæсейы пост» у паддзахадон компани. Закъоны бындурыл адæммæ хæццæ кæны пенситæ æмæ пособитæ, исы коммуналон лæггæдтæн фиддонтæ, уадзы къонверттæ, маркæтæ æмæ открыткæтæ. Уæдæ посты алы хайады дæр балхæнæн ис хуымæтæг, фæлæ хъæугæ товартæ. Уæрæсейы кæцыфæнды къуыммæ дæр æрвитинаг фæхæццæ уыдзæн, æппынкъаддæр, æртæ бонмæ, æнæхъæнæй кæй фæхæццæ уыдзæн, уый дæр бæлвырд у.
Уый у не стыр бæстæйы посты куыстыл йæ цыбыр афæлгæст. Уæдæ куыд кусы Ирыстоны рагондæр хъæу Хъæдгæроны посты хайад, цы зындзинæдтыл æмбæлынц, стæй сæ зæрдæ цæмæй рухс кæны. Хъæдгæроны хъæуы бастдзинады хайады хицауæй кусы Тлатты Маринæ. Æрыдойнаг чызг скъола каст куы фæцис, уæд ахуырмæ бацыд горæт Курскы Бастдзинады техникуммæ, райста дзы операторы дæсныйад. Æрыгон специалисты æхсызгонæй куыстмæ райстой Æрыдоны районы почтамты коллективмæ. Уæдæй нырмæ рацыд 30 азы. Маринæ бæрнонæй æххæст кæны йæ хæстæ. Йæ фæлтæрддзинад æнæвгъауæй дих кæны йе ’мкусджытимæ.
– Ныр æртæ азы кусын Хъæдгæроны. Хъæуы цæрджытæ сæ зæрдæ нæ ивынц газеттæ æмæ журналтыл. Кæй зæгъын æй хъæуы, бирæ ивддзинæдтæ æрцыд, куыд царды, афтæ посты куысты дæр. Раздæр уыдис тынг бирæ корреспонденци. Хорз хъуыды кæнын, фыццаг компьютертæ куы фæзындысты, уæд мæ уæлæмхасæн ахуырад райсынмæ арвыстой Ростовмæ. Ныртæккæ та информацион технологиты æнус ралæууыд, хъыгагæн, адæм къаддæр фыссынц газеттæ, фæлæ уæддæр æнæ «Рæстдзинад», «Северная Осетия» æмæ «Рухс» бирæтæ нæ фæразынц. Журналтæ «Ногдзау» æмæ «Мах дуг» чи уарзы, ахæмтæ дæр нæм ис. Уыдонæн зæгъын уæлдай бузныг. Нæ постхæсджытæ Гæздæнты Эммæ, Дзестелты Фатимæ æмæ Кодзырты Ритæ сæрдæй-зымæгæй сæ уæззау хызынтимæ æнæзивæгæй цæуынц хъæуы уынгты. Се ’рбацыдмæ æнхъæлмæ кæсынц адæм, æмæ уый æхсызгон у, – зæгъы Маринæ. Йæ ныхасмæ гæсгæ, байуарынц газеттæ, журналтæ, фæхæццæ кæнынц пенситæ æмæ пособитæ. Постхæссæг хатгай социалон кусæджы хæстæ дæр райсы йæхимæ, æнæфæразгæ чи у, уыдоны курдиатмæ гæсгæ бафидынц коммуналон лæггæдтæ, посты хайады асламдæр аргъæй уæййаг ис хæдзары хъæугæ лыстæг дзаумæттæ, æмæ сæм сæ фæхæццæ кæнынц. Арæх фехъусынц арфæйы ныхæстæ сæ лæггады тыххæй. Сæ бæрны цы уынгтæ ис, уыдонæй алы бинонты дæр хорз зонынц.
– Посты лæггæдтæй адæм пайда кæнынц, зæгъæм, газæн, рухсæн, донæн, бырæттæ ласынæн, интернетæн ам ис бафидæн, районы центрмæ цæуын сæ нæ хъæуы. Æмгуыстад нын ис банк «ВТБ»-имæ, бирæтæ æфтиæгтæ райсынц, лотерейон билет балхæнгæйæ, æмæ мах дæр сæ циныл бацин кæнæм, – бафтыдта йæ ныхæстæм посты хайады хицау. Зындзинæдтыл дзургæйæ, сылгоймæгтæ загътой, сæ зын куыстæн сын мызд гыццыл кæй фидынц, уый.
Посты республикон управленийы бæрнон кусæг Хъуппеты Валери йæ цæст дары куысты алы хъуыддагмæ.
Æрвылбон сæрмагонд машинæ, йæ фарсыл «Почта России» фыст, хъæумæ сласы æппæт корреспонденци. Зæрдиаг арфæ кæнæм посты кусджытæн сæ профессионалон бæрæгбоны фæдыл. Зæрдæрухс ут уæ бинонтæй, уæ куыстæй.
Гугкаты Жаннæ
