Политикон парти «Иугонд Уæрæсе»-йы Адæмон программæ æмæ проект «Ног скъола»-мæ гæсгæ, ацы аз ахуырады 36 кусæндоны: 24 скъолайы, стæй фæйнæ æхсæз рæвдауæндоны æмæ астæуккаг профессион ахуырады объекты нывылгонд æрцæудзысты.
Рæстæгæй-рæстæгмæ объекттæм æрбацæугæйæ, партийæ депутаттæ æххæстгонд цалцæггæнæн куыстыты хæрзхъæддзинадмæ, стæй, фæрæзтæ æмбæлгæ уагæй хардзгонд цæуынц æви нæ, уымæ цæст дарынц.
Дзæуджыхъæуы 3-æм æмæ 44-æм скъолаты, стæй, Горæтгæрон районы Æрхонкæйы станицæйы 2-æм скъолайы цалцæггæнæн куыстытæ куыд цæуынц, æрæджы «Иугонд Уæрæсе»-йы минæвæрттæ уый рабæрæг кодтой.
Фæстаг æртын азы дæргъы фыццаг хатт 3-æм скъолайы сæр цалцæг кæнынц. Иннæ аз ам мидæггаг аивгæнæн куыстытæ баххæст кæндзысты. 44-æм скъолайы электрон тыхуадзæн телтæ æмæ санитарон ифтонггæрзтæ æххæстæй ивд æрцыдысты. Рæхджы специалисттæ ахуырадон кусæнуæтты мидæг баххæстгæнинаг куыстытæм бавналдзысты.
Фæстаг 54 азы дæргъы Æрхонкæйы 2-æм скъола фыццаг хатт цалцæг кæнынц. Ныридæгæн ам электрон тыхуадзæн телтæ, стæй донæй ифтонгады æмæ хъармгæнæн системæтæ ногтæй баивтой. Ацы бонты ахуырадон кусæнуæттæ аив кæныны куыстытæ кæронмæ фæхæццæ кæнынц.
Ахуыргæнæндæттæ нывылгонд цæуынц канд уый нæ, фæлæ ма сæ нырыккон ахуырадон кусæнгæрзтæй дæр ифтонг кæнынц. Алы сывæллон дæр, йæ цæрæнбынат нæ нымайгæйæ, цæмæй нырыккон, удæнцой уавæрты ахуыр кæна, нæ хæс у ууыл бацархайын.
Нæ уацхæссæг
