Ирыстоны зæхх, æвæдза, дзаг у курдиатджын, куыстуарзаг адæмæй! Алчидæр нæ йæ алыварс куы акæса, уæд иу нæ, фæлæ цалдæр ахæм адæймагыл йæ цæст æрхæцдзæн. Уыдон се ‘ппæт дæр нæ республикæйы фæрныгадыл архайынц, сæ азтæм нæ кæсгæйæ.
Нæ уарзон Ирыстоны уыцы граждæнтæй иу у Мадзайты Еленæ. Ацы бонты йыл сæххæст 90 азы, æмæ уый фæдыл гыццыл арфæтæ нæ райста сылгоймаг. Æмæ, куыд нæ, кæд æмæ йæ фæллойадон стаж хаст æрцыд Уæрæсейы рекордты чиныгмæ!
Цæгат Ирыстоны культурæйы сгуыхт кусæг Мадзайты Еленæ республикæйы Национ чиныгдоны къæсæрæй фыццаг хатт æрбахызт 1956 азы æмæ дзы абоны онг æнтыстджынæй кусы! Зын бамбарæн нæу, йæ куыстадон чиныджы æрмæстдæр иунæг фыст кæй ис. Афтæмæй, Еленæйы æнæаскъуыйгæ стаж у 70 азы! Нæ зæрдæ йын зæгъы, бирæ азты ма чиныгкæсджытыл худæнбылæй куыд æмбæла æнæниз æмæ æнæмастæй!
ГАПБАТЫ Алетæ
