Ацы бонты нæ республикæйы ис уырыссаг литературон æхсæнады пресс-службæйы, «Литературон газет»-ы сæрмагонд проектты, преми «Гипертексты» æмæ æрыгон поэтты æппæтуæрæсеон фестиваль «Мцыри»-йы разамонæг Вероника Одинцова. Уый бабæрæг кодта журнал «Ногдзау»-ы редакци, фембæлд йæ редактор Сæлбиты Дианæ æмæ Ирыстоны адæмон поэт Дзасохты Музаферимæ. Уый нæ уыди хуымæтæг фембæлд, фæлæ ирдæй равдыста нæ культурон царды егъау тыгъдад, гом кæны ног гæнæнтæ Ирыстоны сабиты литературæйы дарддæры рæзтæн.
Вероникæ хорзыл банымадта журналы социалон хызты бæрц æмæ йæ тираж. Уыцы хъуыддаг та феххуыс уыдзæн, æнæмæнг, цæмæй журнал суа ноджы мидисджындæр, ноджы цымыдисагдæр.
Газеткæсæг, чи зоны, бафæрсдзæн, кадджын уазæг уæлдай стыр æргом цæмæн аздæхта нæ сабиты уарзон журналмæ, зæгъгæ. Уымæн ис бæлвырд дзуапп – «Ногдзау» у дзыллон информацийы мадзæлтты сывæллæтты иунæг журнал, уый мыхуыры ирон æвзагыл цæуы суанг 1937 азæй нырмæ æмæ кæны ахсджиаг куыст мадæлон æвзаджы рæзт æмæ йæ хъахъхъæныны хъуыддаджы.
Дызæрдыггаг нæу – федералон центр ацы фарстатæм уæлдай стыр æргом кæй здахы, уый у фидар бындур нæ бирæнацион паддзахады адæмты иудзинадæн дæр.
РЦИ-Аланийы Мыхуыр æмæ
дзыллон коммуникациты пресс-службæ
