Диссаг куыд куыннæ, æвæдза, – гыццыл Ирыстон фурды былгæрон дæр нæу, уæдæ йæм денджызтæ дæр дæрддзæф сты, тæккæ стырдæр донуат – Бехъаны цад, уым дæр æрмæстдæр хуымæтæг бæлæгъыл атезгъо кæндзынæ, нау кæнæ дзы доны бынты цæуæг бæлæгъæн та йæ кой дæр ма кæн. Фæлæ цæмæндæр нæ сахъгуырд фæсивæдæй бирæтæ систы дæсны денджызон специалисттæ, капитантæ, контр-адмиралтæ, сæ бар сын-иу бакодтой æмæ кæнынц абон дæр егъау наутæ, вазыгджын хæстон денджызон техникæ.
Абон нæ ныхас цæуы не ’мзæххон, Советон Цæдисы Æфсæддон-денджызон флоты 1-æм къæпхæны капитан, стратегион нысаниуæгимæ дæлдонты атомон-ракетон крейсеры фыццаг капитан Мæрзойты Махарбеджы фырт Владимиры тыххæй.
Владимир райгуырд 1952 азы 17 августы Алагиры. Астæуккаг скъолайы фæстæ ахуыр кæнынмæ бацыд Владивостокы адмирал Степан Макаровы номыл Сабыр фурды Æфсæддон-денджызон уæлдæр училищæмæ æмæ йæ æнтыстджынæй каст фæци.
Ахуыры фæстæ Владимиры арвыстой Цæгатаг флотмæ, уым йæ хæстæ æнæкъуылымпыйæ æххæст кодта алыхуызон бæрнон бынæтты. Советон дуджы стыр æргом здæхт цыди курдиатджын фæсивæды зонындзинæдтæ фылдæр кæнынмæ, Владимиры дæр æрвыстой Ленинграды горæты Æфсæддон-денджызон академимæ. Каст æй фæци, æмæ йын йæ бар бакодтой К – 460, зæгъгæ, стратегион нысаниуæджы дæлдонты цæуæг ракетон крейсер, уый хаудта Цæгатаг флоты атомон дæлдонты цæуæг 11-æм флотмæ. 1991 азæй фæстæмæ та Мæрзойты Владимир æххæст кодта Северодвинскы горæты дæлдонты цæуæг бæлæгътæ аразæг æмæ цалцæггæнæг хицæн бригады штабы хицауы хæстæ.
Йæ службæ куы ахицæн, уæд йæ бинойнаг Валентинæимæ цæргæйæ баззадысты Северодвинскы, схъомыл кодтой цот – чызг æмæ лæппуйы.
Хъыгагæн, дыууæ азы размæ Владимир йæ цардæй ахицæн, фæлæ йæ фæстæ ныууагъта арфæйаг фæд, йæ цард æмæ паддзахадæн æнæзæрдæхудт лæггад фæзминаг уыдзысты нæ рæзгæ фæлтæрæн.
Знон, 17 августы, Владимирыл хъуамæ сæххæст уыдаид 74 азы.
Æмткæй райсгæйæ, нæ Ирыстонæй Советон Цæдис æмæ Уæрæсейы Æфсæддон-денджызон флоты кадимæ баслужбæ кодтой æмæ ма абон дæр, уырны нæ, кæнынц нæ сæдæгай сахъгуырд лæппутæ. Уыцы хъуыды, æнæмæнг, сæ зæрдыл дардзысты, нæ рæзгæ фæлтæрæй сомбон денджызы романтикæ æмæ цымыдисаг æрдз банкъарынмæ чи бабæлла, уыцы фæсивæд.
Дзарасаты Сергей
