Республикæйы Хицауады радон æрвылкъуырион аппаратон æмбырд амыдта РЦИ-Аланийы Хицауады Сæрдар Дзанайты Барис. Ныхас дзы цыд регионы зынгсирвæзтытæ ма ’руадзыныл æмæ æндæр ахсджиаг фарстатыл. Архайдтой дзы министрадтæ æмæ ведомствæты разамонджытæ, районты хиуынаффæйады администрациты сæргълæуджытæ.
Хицауады Сæрдары хæдивæг Томайты Ирбег фехъусын кодта республикæйы оперативон уавæр.
– Ивгъуыд къуырийы дæргъы республикæйы æвирхъау цаутæ бæрæггонд не ’рцыд. Цæгат Ирыстоны метеослужбæйы хъусынгæнинагмæ гæсгæ, зынгсирвæзтытæй тæссагдзинадæн лæвæрд æрцыд 4-аг къæпхæн. Республикæйы фондз районы æмæ 26 хъæуы æххæстгонд цæуы зынгсирвæзт ма ’руадзыны тыххæй сæрмагонд режим. 10 августæй 16 августмæ ахуыссын кæнын бантыст 17 зынгсирвæзты. Хъыгдард дзы ничи баййæфта. Регионы сæрмагонд службæтæ архайынц бæрзонд цæттæдзинады уавæрты. Цæгат Ирыстоны автоинспекцийы хъусынгæнинагмæ гæсгæ, республикæйы фæндæгтыл æрцыд 76 фæндаггон фыдбылызы. Хъыгдард дзы баййæфтой 23 адæймаджы. Арвыком æмæ Транскамы фæндæгтæ гом сты æппæт автотранспорты
хуызтæн дæр. Республикæйы фæндæгтыл электронон рады æнхъæлмæ кæсынц 604транзитон уæзласæн машинæйы. Уæрæсейы Федераци æмæ Гуырдзыстоны арæныл уæлдæр амынд рæстæгмæ дыууæрдæм ахызтысты 32125 автотранспортон иуæджы æмæ 109909 адæймаджы, – загъта Томайы-фырт.
Æнæнхъæлæджы уавæрты министрады хъусынгæнинагмæ гæсгæ, республикæйы ахуыссын кæнын бантыст 17 зынгсирвæзты. 8 адæймаджы дзуапп ратдзысты закъоны раз, хус кæрдæгыл арт кæй бандзæрстой, уый тыххæй. Æнæнхъæлæджы уавæрты министрад РЦИ-Аланийы Хицауады Сæрдар Дзанайты Барисмæ балæвæрдта курдиат, цæмæй Мæздæджы æмæ Рахизфарсы районты æнæнхъæлæджы уавæры режим нысангонд æрцæуа.
Министрады минæвар куыд загъта, уымæ гæсгæ бæрæггонд цæуы республикæйы цæугæдæтты доны æмвæзад дæр.
Цæгат Ирыстоны Мидхъуыддæгты министрад куыд фехъусын кодта, афтæмæй 10 августæй 16 августмæ регионы ‘рцыд 138 фыдракæнды. Раргом кæнын дзы бантыст 69. Ноджы ма сбæрæг кодтой 3 мæнг хъусынгæнинаджы терроризмон акты тыххæй. Арæзт цæуынц слестгæнæн мадзæлттæ.
Цæгат Ирыстоны «Роспотребнадзор»-ы хайад фехъусын кодта, республикæйы эпидемиологион уавæр нывыл кæй у, уый. Тъæнгты хæцгæ низтæй рынчынты нымæц фæныллæгдæр 5,1 проценты онг, æрвылазы сæрдыгон эпидемиологион бæрæггæнæнтимæ абаргæйæ та – 12,3 проценты онг. Ивгъуыд къуыри ног коронавирусон инфекци разынд æртæ адæймагмæ. Æрвылбон дæр лабораториты цæстдард цæуы нуазыны доны хæрзхъæддзинадмæ.
РЦИ-Аланийы Ахуырад æмæ наукæйы министрады хъусынгæнинагмæ гæсгæ, республикæйы æппæт астæуккаг ахуырадон скъолатæ дæр цæттæ сты ног ахуыры азмæ. Уыдонимæ сты, бындурон цалцæг чи ‘рцыд, уыцы 19 скъолайы дæр. Фыццæгæм къласмæ бацæуыны тыххæй балæвæрдтой 7985 курдиаты, – зæгъынц министрады.
– Ивгъуыд къуыри бензин нæ республикæмæ æфтыд чысыл къуылымпытимæ, фæлæ уавæр тæссаг нæу, цæуы йæм бæлвырд цæстдард, – уый тыххæй аппаратон æмбырды фехъусын кодта РЦИ-Аланийы цæрæнуатон-коммуналон хæдзарад, артаг æмæ энергетикæйы министр Хъараты Тимур. Йæ ныхасмæ гæсгæ, æппæт артаг æвгæнæн станцæты дæр бензин ис, фæлæ уæддæр ранæй-рæтты рады лæууæг машинæты нымæц сбирæ вæййы. Цæрæнуатон-коммуналон хæдзарад, артаг æмæ энергетикæйы министрад æмæ «ФАС» куыд сбæрæг кодтой, афтæмæй фондз артаг æвгæнæн станцæйы æнæзакъонæй бафтыдтой артаджы аргъыл. Закъон хæлд кæй æрцыд, уый тыххæй сыл сарæзтой сæрмагонд акттæ. Ныр сæ хицæуттæ дзуапп ратдзысты закъоны раз.
Ноджы ма министр фехъусын кодта, зымæджы хъармгæнæн рæстæгмæ 75 проценты бæрц цæттæ кæй сты, уый.
Æмбырды ныхас цыд æндæр ахсджиаг фарстатыл дæр.
ХЪОЙБАЙТЫ Галинæ
