РЦИ-Аланийы Хицауады Сæрдар Дзанайты Барис сарæзта æмбырд нæ республикæйы куыстдæттæг центрты модернизацийы фæдыл. Архайдтой дзы подрядон организацитæ æмæ æххæстгæнæг оргæнты разамонджытæ.
Ацы аз Цæгат Ирыстоны национ проект «Кадртæ»-йы бындурыл фæнд кæнынц куыстдæттæг центрты модернизаци 10 объекты. Ног нысантæн æхцайы фæрæзтæ дихгонд æрцæудзæн 300 милуан сомы. Объектты ногдæр хуызы фæрцы гæнæн уыдзæн нырыккон технологитæ æмæ механизмтæй пайдагæнгæйæ куыстдæттæг æмæ куыстагурджытæн ногдæр уавæрты лæггæдтæ райсынæн.
РЦИ-Аланийы Куыстдæттæг центры комитеты сæргълæууæг Анжела Эммануилиди куыд радзырдта, афтæмæй бындурон цалцæгимæ иумæ æлхæд цæуынц æнæмæнгхъæугæ ифтонггæрзтæ æмæ дзаума. Дзанайты Барис бахæс кодта, хъуыддагмæ бæлвырд цæстдард куыд цæуа.
– Ног цалцæггонд центрты нæ республикæйы цæрджытæн фадат уыдзæн æппæт паддзахадон лæггæдтæ дæр бæрзонддæр æмвæзадыл райсынæн. Системæйы модернизацигонд бындурыл куыстæн стыр ахадындзинад уыдзæн куыстдæттæг æмæ куыстагурджыты домæнтæ æххæст кæныны фарстаты. Нæ республикæйы цæрджытæн куыстытæ ссарыны тыххæй, хъæугæ уавæртæ саразын нæ архайды нысантæй иу у – уый уыд Цæгат Ирыстоны Сæргълæууæджы бардзырд. Уымæ гæсгæ, курын стыр бæрнонæй ацы фарстайы нысантæ сæххæст кæнын, – загъта Дзанайты Барис.
САУТÆТЫ Тамилæ
