Цæгат Ирыстонмæ кусæг балцы ссыд Уæрæсейы Федерацийы наукæ æмæ уæлдæр ахуырады министр Валерий Фальков. РЦИ-Аланийы Сæргълæууæг Сергей Меняйлоимæ фембæлгæйæ æрныхас кодтой регионы наукон-ахуырадон инфраструктурæйы рæзтыл æмæ уæлдæр ахуырады ахсджиагдæр проекттыл. Уæлдай æргом аздæхтой кадртæ цæттæ кæныны хъуыддагмæ.
Сергей Меняйло арфæ ракодта Валерий Фальковæн, Уæрæсейы Федерацийы наукæ æмæ уæлдæр ахуырады министрад Цæгат Ирыстоны цы проекттæ æххæстгонд цæуынц, уыдонмæ стыр æргом кæй здахы, уый æмæ æххуысы тыххæй.
– Цæгат Ирыстон ныридæгæн æмгуыстады тыххæй бадзырдтæ сарæзта нæ бæстæйы раззагдæр университеттæй цалдæримæ. Ахсджиаг у, цæмæй уыдон иууылдæр суой бæлвырд хъæппæристæ – иумæйаг ахуырадон программæтæ, наукон иртасæн куыстытæ, стажировкæтæ æмæ ног гæнæнтæ студенттæ æмæ ахуыргæнджытæн, – фæбæрæг кодта Сергей Меняйло.
Йæ балцы фæлгæты Валерий Фальков бабæрæг кодта Цæгат Ирыстоны Хетæгкаты Къостайы номыл паддзахадон университет æмæ Цæгат Кавказы хæххон-металлургон институт. Уымæй размæ та, 2004 азы 1-3 сентябры теракты амæттæгты рухс ном ссардта мемориалон комплекс «Зæдты горæт»-ы, дидинджытæ сæвæрдта Беслæны пырхгонд 1-æм скъолайы спортивон залы.
Йæ балцы программæмæ гæсгæ, терроризм не ‘руадзыны Дунеон культурон-патриотон центр «Беслæн. 1-æм скъола», бабæрæг кодта. Ам бæлвырдæй æвдыст æрцыдысты 22 азы размæ цы трагикон цаутæ æрцыд, уыдон. Валерий Фальков æрзылд, сывæллæттæ æмæ ахуыргæнджыты, уыцы æвирхъау бонты скъолайы чи бахауд æмæ сын æххуыс чи кодта, уыдоны хабæрттæ фыст кæм æрцыдысты, уыцы залтыл.
ХЪОЙБАЙТЫ Галинæ
