Адæймаджы зæрдæйыл æхцондзинад куы сæмбæлы, уæд цыма аргъæутты бæстæмæ бафты, уыйау йæ цæстытыл ауайынц алыхуызон рæсугъд нывтæ: хуры скаст, сæууон æртæхтæ цъæх кæрдæгыл, суадæтты сыр-сыр, булæмæргъы зард, зæрватыччыты цъыбар-цъыбур æмæ афтæ дарддæр…
О, æнæмæнг, зæрватыкк ауад мæ цæстытыл, фыццаг хатт ацы гыццыл курдиатджын чызджы куы ауыдтон, уæд. Йæ ныййарджытæ йæ хуртæй бафсæдæнт.
Хъодалаты Миланæйыл нырма фараст азы йеддæмæ нæ цæуы, ахуыр кæны цыппæрæм къласы, фæлæ ныридæгæн йæ репертуары уыйбæрц зарджытæ ис, æмæ йæм бирæ номдзыд артисттæ бахæлæг кæндзысты. Æрæджы Миланæйы йæ мад Ларисæимæ æрбахуыдтам нæ редакцимæ. Ларисæ у ирон æвзаг æмæ литературæйы ахуыргæнæг. Дызæрдыггаг нæу, мадæлон æвзагмæ уарзондзинад бинонтæй кæй рахаста Миланæ, уый. Уæдæ у хæрзæгъдау, æфсæрмыгæнаг сывæллон. Бæрæг у, ныхас кæнынæй йын зарын æнцондæр кæй у. Зæрватыкк йæ базыртæ куыд сисы æмæ арвы тыгъдады сæрибарæй куыд ленк кæны, афтæ Миланæ дæр йæ хъуыдытæ, йе ’нкъарæнтæ æнцондæрæй равдисы аивады фæрцы. Кæсаг æнæ донæй куыд нæ цæры, афтæ Миланæ дæр иунæг бон дæр æнæ зарынæй нæ фæразы. Уыцы аивадмæ тырнындзинад ын йæ мад Ларисæ раджы банкъардта. Æвæццæгæн, авдæнæй куы рахызт, уæд йæ царды нысан, йæ фидæн йæ ныхыл фыст æрцыд.
Миланæйыл æртæ азы куы рацыд, уæд æй йæ мад бахуыдта зындгонд зарæггæнæг, музыкант, поэт æмæ композитор Собиты Русланæмæ. Русланæ байгом кодта хи музыкалон скъола-студи сывæллæттæн. Уый канд разамонæг нæу, фæлæ у дæсны педагог дæр. Алы ахуырдзауæн дæр банкъары йæ арæхстдзинад, йæ авналæнтæ, йæ курдиаты гæнæнтæ. Узæлгæйæ, рæвдаугæйæ сын амоны аивады сусæгдзинæдтæ, фæндаг сын дæтты стыр сценæмæ.
Русланæ раиртæста, сывæллонмæ Хуыцауы курдиат кæй фæхæццæ, фæлæ нырма æгæр гыццыл кæй уыд, уый тыххæй йæ нæ райста, тæригъæд у, иугыццыл ма байрæза, зæгъгæ.
– Афæдзы фæстæ та йæ ногæй бахуыдтон Русланæмæ. Уый йæм байхъуыста æмæ йæ заргæйæ систа йæ телефонмæ æмæ йæ цавæрдæр вокалон конкурсмæ арвыста. Раст зæгъгæйæ, æнхъæл дæр нæ уыдыстæм, фæлæ уыцы конкурсы Миланæ фыццаг бынат бацахста, – зæгъы йæ мад Ларисæ.
Уæдæй нырмæ Миланæ архайы алыхуызон музыкалон конкурстæ æмæ фестивальты æмæ алы ран дæр свæййы уæлахиздзау. Йе ’вæрæнты ныридæгæн бирæ дипломтæ æмæ майдантæ фæзындис. Се ’хсæн сты: «Музыкалон-аивадон сфæлдыстады ХХХ дунеон конкурсфестиваль» Сочийы, «Аивæдты VII дунеон фестиваль «Алайнаг стъалытæ», «Æппæтуæрæсеон фестиваль-конкурс «Вершина Кавказа» æмæ æндæртæ. Миланæ ныридæгæн йæ гыццыл удæй лæггад кæны æмæ кад хæссы нæ уарзон Ирыстонæн.
Ныртæккæ Миланæ ахуыр кæны РЦИ-Аланийы Культурæйы министрады сывæллæтты музыкалон скъолайы. Зарджытæ та йын фыссынц Собиты Русланæ æмæ Лалыты Альберт.
Уæдæ дарддæр æнхъæлмæ кæсæм Миланæйы ног сфæлдыстадон æнтыстдзинæдтæм. Амондджынæй байрæзæд æмæ йæ ныййарджыты фæндиаг уæд.
Хъойбайты Галинæ
