РЦИ-Аланийы Сæргълæууæг Сергей Меняйло архайдта Евгений Вахтанговы номыл Уырыссаг академион театры 155 азы юбилейон мадзæлтты.
Бæрæгбоны архайджытæ бакастысты театры равзæрды историйы æппæты зындгонддæр, ирддæр алы азты спектакльты
скъуыддзæгтæм, хореографион æвæрд æмæ раззагдæр артистты вокалон номыртæм. Нæ республикæйы Сæргълæууæг зæрдæбын арфæтæ ракодта сфæлдыстадон коллективæн. Сергей Меняйло йæ арфæты фæнысан кодта, æнус æмæ æрдæджы историйы хъысмæты театрæн цы хъæздыг традицитæ сæвзæрд, фæлтæрты бастдзинад æмæ профессионалон дæсныйады æцæг скъола кæй у, уый тыххæй.
– 155 азы – уый хуымæтæджы нымæц нæу. Нæ Уырыссаг театры истори алы рæстæджыты фæлтæрты æмæ мингай адæмы хъысмæты истори у, театр хи хæдзар кæмæн сси, ахæмты. Бирæ регионтæ нæ раппæлдзысты, алыхуызон цаутæ чи бавзæрста æмæ уæддæр йæ куыст кæмæн не ‘рлæууыд, ахæм театрты карæй. Уæдæ йын уыдис æнтыстдзинæдтæ, æнкъард æмæ циндзинады замантæ дæр, фæлæ, уыцы цаутæ иууылдæр ахъаз фесты йæ кад ын фæбæрзонддæр кæнынæн.
Бирæ азты дæргъы театры сæргъы лæууы Владимир Уваров. Уый архайды фæрцы канд нæ республикæйы нæ, фæлæ æндæр рæтты дæр хъуысы Евгений Вахтанговы ном. Сæйраг ма у театрдзауты ахастдзинад, уыдон æдзух дæр æнцой лæууынц театры аивадæн. Нæхи вахтанговонтæ та æппæты хуыздæртæ сты, – загъта Сергей Меняйло.
Ахъаззаджы куыст æмæ профессионалон архайды тыххæй нæ республикæйы Кады гæххæттытæй хорзæхджын æрцыдысты Уырыссаг академион театры артисттæ Биазырты Давид æмæ Еленæ Горячева.
Уырыссаг театр Дзæуджыхъæуы байгом 1871 азы, Лермонтовы драмæмæ гæсгæ æвæрд спектакль «Маскарад»-æй. Абон театры репертуары ис 50 спектаклы бæрц хистæр кары адæм æмæ сывæллæттæн. Уырыссаг театр у æнæсцух архайæг æмæ бирæ уæрæсейаг æмæ æппæтадæмон театралон фестивальты уæлахиздзау. 1992 азæй театры коллективæн разамынд дæтты Уæрæсе æмæ Цæгат Ирыстоны адæмон артист «Золотая маска» æмæ Хетæгкаты Къостайы номыл Паддзахадон премиты лауреат, Владимир Уваров.
Саутæты Тамилæ
