РЦИ-Аланийы Хицауады радон æрвылкъуырион аппаратон æмбырд амыдта Хицауады Сæрдар ДЗАНАЙТЫ Барис. Ныхас цыд республикæйы æдасдзинад æмæ социалон-экономикон рæзты фарстатыл. Архайдтой дзы министрадтæ æмæ ведомствæты разамонджытæ, республикæйы районты сæргълæуджытæ.
РЦИ-Аланийы граждайнаг хъахъхъæнынад æмæ æнæнхъæлæджы уавæрты комитеты сæрдар Александр Хоружий фехъусын кодта республикæйы оперативон уавæр.
– Ивгъуыд къуырийы дæргъы республикæйы æвирхъау цаутæ бæрæггонд не ’рцыд. Æртæ районы 20 хъæуы дарддæр дæр тæссаг у зынгсирвæзтытæй. 28 сентябрæй 4 октябрмæ ахуыссын кæнын бантыст 11 зынгсирвæзты. Дыууæ адæймаджы дзы фæмард. Регионы сæрмагонд службæтæ архайынц бæрзонд цæттæдзинады уавæрты. Цæгат Ирыстоны автоинспекцийы хъусынгæнинагмæ гæсгæ, республикæйы фæндæгтыл æрцыд 109 фæндаггон фыдбылызы. Хъыгдард дзы баййæфтой 27 адæймаджы. Арвыком æмæ Транскамы фæндæгтæ гом сты æппæт автотранспорты хуызтæн дæр. Республикæйы фæндæгтыл электронон рады æнхъæлмæ кæсынц 584 машинæйы. Уæрæсейы Федераци æмæ Гуырдзыстоны арæныл уæлдæр амынд рæстæгмæ дыууæрдæм ахызтысты 23960 автотранспортон иуæджы æмæ 60520 адæймаджы, – загъта Александр Хоружий.
Цæгат Ирыстоны Мидхъуыддæгты министрады хъусынгæнинагмæ гæсгæ, 28 сентябрæй 4 октябрмæ регионы æрцыд 168 фыдракæнды. Раргом кæнын дзы бантыст 93. Къуырийы дæргъы цалдæр хатты сæвзæрд тæссаг уавæр, фæлæ республикæйы сæрмæ æнæтæхæг аппараттæ бæрæггонд не ’рцыд.
Фæстаг къуырийы дæргъы Цæгат Ирыстоны ахуыссын кæнын бантыст 11 зынгсирвæзты, уыдонæй 5 – хус кæрдæджы ссыгъдтытæ. Хъыгагæн дзы дыууæ адæймаджы фæмард сты. Уый тыххæй аппаратон æмбырды фехъусын кодта РЦИ-Аланийы Æнæнхъæлæджы уавæрты министрад.
«Роспотребнадзор»-ы регионалон хайад фехъусын кодта, республикæйы эпидемиологон уавæр нывыл кæй у, уый. Ивгъуыд къуыри дыууæ адæймагмæ разынд грипп, æртæмæ та – ног коронавирусон инфекци.
Цæгат Ирыстоны Ахуырад æмæ наукæйы министрады хъусынгæнинагмæ гæсгæ, скъолаты рынчын сывæллæтты нымæц у дæс проценты, рæвдауæндæтты та – 14 проценты. Ноджы ма 28 сентябрæй нæ республикæйы арæзт цæуы ахуыргæнджыты стыр къуыри.
Дзанайты Барис йæ хæдивæг Алыбегты Эллæйæн бафæдзæхста, цæмæй дарддæр дæр республикæйы ахуырадон уагдæттæм йæ цæст дара, рæвдауæндæттæ æмæ скъолаты алы райсом дæр сывæллæтты æнæниздзинад бæрæггонд цæуа. Дарддæр ма Хицауады Сæрдар фæбæрæг кодта, 15 октябры ирон адæмы уарзондæр поэт, ирон литературон æвзаджы бындурæвæрæг Хетæгкаты Къостайы райгуырæн боны мадзæлттæм куыд бацæттæ кæной.
РЦИ-Аланийы цæрæнуатон-коммуналон хæдзарад, артаг æмæ энергетикæйы министр Хъараты Тимур фехъусын кодта, Цæгат Кавказы металлургон институты студенттæ-волонтертæ «Роснефть»-ы артагæвгæнæн станцæты æгъдаухæлд ма ’руадзыны тыххæй абонæй фæстæмæ рад хæссын кæй райдайдзысты, уый.
Æмбырды ныхас цыд æндæр ахсджиаг фарстатыл дæр.
ХЪОЙБАЙТЫ Галинæ
