Знон Дзæуджыхъæуы Сывæллæтты сфæлдыстады республикон галуаны кадджын уавæры сбæрæг кодтой, зонындзинæдтыл, культурæ æмæ æгъдауыл кæстæрты чи ‘фтауы, уыдоны профессионалон бæрæгбон – Ахуыргæнæджы бон.
Аив фæлыст залы адæм иууылдæр хъæлдзæг, хæрзарæзт – нæ республикæйы районтæ æмæ Дзæуджыхъæуы скъолаты минæвæрттæ. Сценæйы стыр экранæй сывæллæттæ кæсынц æмдзæвгæтæ, арфæ кæнынц сæ ахуыргæнджытæн. Бацæттæ кодтой сæ нывты равдыст «Мæ ахуыргæнæг, мæ хъомылгæнæг».
Онлайн-бастдзинады фæрцы Ирыстоны хуыздæр ахуыргæнджытæн арфæ ракодта Уæрæсейы ахуырады министр Сергей Кравцов. Ныхас кодта уæлæмхасæн æххуысы педагогты царды уавæртæ хуыздæр кæныны мадзæлтты тыххæй.
– Ныртæккæ скъолаты чи кусы, уыдон хъомыл кæнынц, райсом Уæрæсейы кад дарддæр чи хæсдзæн, уыдоны. Педагогон куысты ветерантæ, æрыгон ахуыргæнджытæ, уæ куыст æнтыстджын уæд! – загъта Сергей Кравцов.
– Зынаргъ ахуыргæнджытæ æмæ хъомылгæнджытæ! Зæрдиаг арфæ уын кæнын Уæрæсейы ахуыргæнæджы боны фæдыл!
Бæрнон хæс æвæрд уыл ис – республикæйы рæзгæ фæлтæр хъомыл кæнын æмæ йын зонындзинæдтæ дæттын, цæмæй нæ бæстæйæн аккаг граждæнтæ уой. Педагогон фæллойы ветерантæ, æрыгон ахуыргæнджытæ – иууылдæр æнувыд стут уæ дæсныйадыл, удуæлдай фæллой кæнут. «Ахуыргæнæг» – ацы дзырд уæлдай фæлмæнæй, хъармæй хъуысы мадæлон æвзагыл. Уыцы иу рæстæг стут хъомылгæнджытæ, психологтæ. Ахуыр кæнут сабиты, цы у хорз æмæ æвзæр, бахъуаджы рæстæг стут сæ фарсмæ, сымах хуызæн уæвын фæнды алкæйы дæр. Уый тыххæй уын бузныг.
Мах дарддæр дæр архайдзыстæм, цæмæй нæ сæйрагдæр хæстæй иу – ахуырады системæйæн æххуыс – æххæстгонд цæуа. Арфæйы ныхæсты аккаг стут иууылдæр, фæлæ хицæнæй зæгъдзынæн райдайæн кълæсты ахуыргæнджыты тыххæй, уыдон æвæрынц бындур ахуыры фæндагмæ, сывæллон фыццаг къахдзæфтæ уыдонимæ акæны.
Бузныг уын, нæ зынаргъ ахуыргæнджытæ! Амондджын, æнæниз æмæ зæрдæрухс ут. Бæрæгбоны хорзæх уæ уæд! – загъта республикæйы Сæргълæууæг æмæ къорд адæймагæн ратта паддзахадон хæрзиуджытæ.
Ирыстоны ахуыргæнджытæн, хъомылгæнджытæн, уæлæмхасæн ахуырады педагогтæн зæрдиаг арфæ ракодта РЦИ-Аланийы ахуырад æмæ наукæйы министр Андрей Швецов дæр æмæ Кады грамотæтæ ратта, ахуыргæнæджы ном бæрзонд чи хæссы, уыдонæн.
Ахуырады къабазы бирæ азты дæргъы æнæзæрдæхудт æмæ удæлдай куыст кæй фæкодтой, уый тыххæй Уæрæсейы Федерацийы Рухсады министры бардзырдæй «Уæрæсейы Федерацийы Ахуырады къабазы сгуыхт кусæджы» кадджын ном лæвæрд æрцыд:
Марина Антоновайæн – Уæрæсейы Федерацийы Хъæбатыр Карен Шишкины номыл горæт Мæздæджы 7-æм астæуккаг скъолайы райдайæн кълæсты ахуыргæнæгæн;
Карен Арзумановæн – Мæздæджы районы Винограднæйы хъæуы астæуккаг скъолайы истори æмæ æхсæнадзонынады ахуыргæнæгæн;
Æхполæтты Ирмæйæн – Советон Цæдисы Хъæбатыр Къесаты Астаны номыл горæт Дзæуджыхъæуы 41-æм астæуккаг скъолайы райдайæн кълæсты ахуыргæнæгæн;
Людмила Вороновайæн – горæт Дзæуджыхъæуы бынæттон хиуынаффæйады администрацийы ахуырады управленийы иумæйаг æмæ уæлæмхасæн ахуырады хайады сæргълæууæгæн;
Дарчиты Анжелæйæн – Кировы районы Змейкæйы станицæйы 2-æм астæуккаг скъолайы истори æмæ æхсæнадзонынады ахуыргæнæгæн;
Джыккайты Инессæйæн – ахуырадон центр «Эрудит»-ы ирон æвзаг амонæг æмæ хъомылгæнæгæн;
Дулаты Маринæйæн – Советон Цæдисы Хъæбатыр Милдзыхты Хадзымырзæйы номыл горæт Дзæуджыхъæуы 15-æм скъолайы директорæн;
Хъуылымбегты Альбинæйæн – Кировы муниципалон районы бынæттон хиуынаффæйады администрацийы ахуырады управленийы хицауæн;
Рубайты Светланæйæн – горæт Дзæуджыхъæуы 47-æм астæуккаг скъолайы директорæн;
Марина Самсонашвилийæн – горæт Дзæуджыхъæуы лицейы уырыссаг æвзаг æмæ литературæйы ахуыргæнæгæн;
Хосонты Фатимæйæн – горæт Дзæуджыхъæуы 30-æм астæуккаг скъолайы райдайæн кълæсты ахуыргæнæгæн.
Уымæй уæлдай, педагогон архайды стыр сгуыхтдзинæдты, стæй, сæ куысты мидæг иттæг дæсны кæй сты, уый тыххæй Республикæ Цæгат Ирыстон-Аланийы Сæргълæууæджы Указæй «Республикæ Цæгат Ирыстон-Аланийы сгуыхт ахуыргæнæджы» кадджын ном лæвæрд æрцыд:
Еналдыты Риганæйæн – Виктор Коняевы номыл горæт Дзæуджыхъæуы 22-æм астæуккаг скъолайы биологийы ахуыргæнæгæн;
Пагæты Светланæйæн – Уæрæсейы Хъæбатыр Джыбылаты Зауыры номыл горæт Беслæны 6-æм астæуккаг скъолайы уырыссаг æвзаг æмæ литературæйы ахуыргæнæгæн.
Гугкаты Жаннæ
