РЦИ-Аланийы Хицауады радон æрвылкъуырион аппаратон æмбырд амыдта республикæйы Сæргълæууæг Сергей МЕНЯЙЛО. Архайдтой дзы министрадтæ æмæ ведомствæты разамонджытæ, муниципалон районты хицæуттæ. Ныхас кодтой зымæджы хъармгæнæн рæстæгмæ цæттæдзинадыл, регионалон æмæ федералон программæтæ куыд æххæстгонд цæуынц, ууыл, æмæ æндæр ахсджиаг социалон-экономикон фарстатыл.
Æмбырды райдиан Сергей Меняйло фехъусын кодта, инæлар Владимир Устинов йæ æххуысгæнæгæй нысангонд кæй æрцыд, уый.
– Цы фæндтæ æмæ хъуыдытæ рахæсса, уыдон иууылдæр æнæмæнг æххæстгонд куыд цæуой, афтæ, – фæбæрæг кодта республикæйы разамонæг.
Хицауады Сæрдары хæдивæджы хæстæ рæстæгмæ æххæстгæнæг Томайты Ирбег фехъусын кодта республикæйы оперативон уавæр:
– Ивгъуыд къуырийы дæргъы республикæйы æвирхъау цаутæ бæрæггонд не ’рцыд. Цæгат Ирыстоны дыууæ районы: Горæтгæрон æмæ Мæздæджы 15 хъæуæн дарддæр дæр тæссаг у зынгсирвæзтытæй, уымæ гæсгæ дзы æххæстгонд цæуы сæрмагонд уавæр. Ивгъуыд къуыри ахуыссын кæнын бантыст 12 зынгсирвæзты, 4 термостъæлфы æмæ дыууæ – хус кæрдæг. Регионы сæрмагонд службæтæ архайынц бæрзонд цæттæдзинады уавæрты. Цæгат Ирыстоны автоинспекцийы хъусынгæнинагмæ гæсгæ, республикæйы фæндæгтыл æрцыд 84 фæндаггон фыдбылызы. Хъыгдард дзы баййæфтой 19 адæймаджы æмæ сæ æвæстиатæй рынчындонмæ аластой. Хъыгагæн дзы дыууæ адæймаджы фæмард сты. Арвыком æмæ Транскамы фæндæгтæ гом сты æппæт автотранспорты хуызтæн дæр. Республикæйы фæндæгтыл электронон рады æнхъæлмæ кæсынц 311 автотранспортон иуæджы. Уæрæсейы Федераци æмæ Гуырдзыстоны арæныл къуырийы дæргъы дыууæрдæм ахызтысты 23880 автотранспортон иуæджы æмæ 59 мин адæймаджы, – загъта Томайы-фырт.
Æнæнхъæлæджы уавæрты министрады регионалон управленийы хъусынгæнинагмæ гæсгæ, республикæйы ахуыссын кæнын бантыст 23 зынгсирвæзты, уыдонимæ – хус кæрдæджы сыгъд дæр.
Цæгат Ирыстоны Мидхъуыддæгты министрад куыд фехъусын кодта, афтæмæй 5 октябрæй 11 октябрмæ республикæйы æрцыд 129 фыдракæнды. Раргом кæнын дзы бантыст 82. Ивгъуыд къуырийы дæргъы барадхъахъхъæнæг оргæнтæм фæхабар кодтой, 9 объекты рæмудзæн предметтæ кæй бавæрдтой, уый тыххæй. Æппæт хъæугæ мадзæлттæ саразгæйæ, сбæрæг хъусынгæнинæгтæ мæнг кæй разындысты. Дарддæр цæуынц слестгæнæн мадзæлттæ.
Сергей Меняйло аппаратон æмбырды бафæдзæхста, республикæйы æрыгон раздзогты программæ саразын.
– Уый фæахъаз уыдзæн фæсивæды ’хсæн курдиатджын специалисттæ, амалхъомтæ, ахуыргæндтæ, æхсæнадон архайджытæ æмæ сæрмагонд проектты автортæ раргом кæнынæн. Архайджытæн сараздзысты ахуырадон æмæ зондамонæн æххуыс, алыхуызон фадæттæ, респуб-ликæйы рæзтæн ахъаз чи уыдзæн, ахæм хъæппæристæ баххæст кæнынæн. Уыцы хъуыддаг æххуыс уыдзæн кадрты фарстайæн дæр, – фæбæрæг кодта республикæйы Сæргълæууæг.
«Роспотребнадзор»-ы регионалон хайад фехъусын кодта, республикæйы эпидемиологон уавæр нывыл кæй у, уый. Уыимæ, ОРВИ-йæ рынчынты нымæц 2,2 проценты фæфылдæр, фæлæ эпидемиологон бæрæггæнæнтæй нæ ахызт. Рынчынты фылдæр хай сты сывæллæттæ – 70 проценты. Ахуыргæнæндæттæ æмæ рæвдауæндæтты алы райсом дæр цæстдард цæуы сывæллæтты æнæниздзинадмæ. Ивгъуыд къуыри республикæйы грипп разынд цыппар адæймагмæ, ног коронавирусон инфекци бæрæггонд не ’рцыд.
Цæгат Ирыстоны Ахуырад æмæ наукæйы министры хæстæ рæстæгмæ æххæстгæнæг Андрей Швецовы ныхасмæ гæсгæ, рæвдауæндæтты рынчын сывæллæтты нымæц у 14 проценты, скъолаты та – 10 проценты. Уыимæ, карантины æхгæд кълæстæ æмæ группæтæ нæй.
РЦИ-Аланийы цæрæнуатон-коммуналон хæдзарад, артаг æмæ энергетикæйы министры хæстæ рæстæгмæ æххæстгæнæг Хъараты Тимур æмбырды фехъусын кодта, Цæгат Ирыстоны хъармгæнæн рæстæг 15-17 октябры кæй райдайдзæн, уый. Йæ ныхасмæ гæсгæ, зымæджы хъармгæнæн рæстæгмæ цæттæдзинад у 100 проценты. Дарддæр ма министр фæбæрæг кодта артаджы уавæр дæр:
– Республикæйы бензин ис 2031 тоннæйы, дизель та – 1714 тоннæйы. Хæстæгдæр рæстæг ма регионмæ æрбаласдзысты 3201 тоннæйы бензин æмæ 1215 тоннæйы дизель.
Æмбырды ма РЦИ-Аланийы Хицауады Сæрдар Дзанайты Барис районты сæргълæуджыты ’ргом аздæхта муниципалон скондты сыгъдæгдзинадмæ.
– Цæрджытæ хъаст кæнынц, уынгтæ æфснайд кæй нæ цæуынц, уымæй, – загъта Хицауады Сæрдар.
Æмбырды ныхас цыд æндæр ахсджиаг фарстатыл дæр.
ХЪОЙБАЙТЫ Галинæ
