Дарддæр цæуы Уæрæсейы æфсады рæнхъы- тæм æрсидт. Уый райдыдта 1 апрелы. Ацы азы уалдзыгон æрсидты мæйты Дзæуджыхъæуæй Гæрзифтонг тыхты рæнхъытæм æрвыст æрцæудзæн 250 адæймаджы. Горæты æфсæддон комиссарады куыд загътой, афтæмæй æрсидт фæуыдзæн сусæны мæйы æмбисы.
Горæтаг лæппутæ æфсады службæ кæнынмæ æрвыст æрцæудзысты бæстæйы бирæ горæттæм. Сидтонты дзæвгар хай службæ кæндзæн Хъахъхъæнынады министрады дæлхайæдты, стæй Национ гвардийы æфсæдты.
— Дзæуджыхъæуккаг сидтонтæ службæ кæндзысты Санкт-Петербургæй Хабаровскмæ, Буйнакскæй Челябинскмæ регионты цы æфсæддон хæйттæ ис, уыдоны. Лæппутæ Фыдыбæстæйы раз сæ граждайнаг хæс фиддзысты сурзæххон æмæ æфсæнвæндагон æфсæдты, æфсæддон-космосон æмæ уæлдæфон тыхты, Национ гвардийы æфсæдты, — зæгъы горæт Дзæуджыхъæуы æфсæддон ко- миссар Беджызаты Роберт.
Æфсæддон комиссарады ма радзырдтой, йæ службæйы æмгъуыд азæйазмæ кæмæн æргъæвтой, афтæмæй 27 азы кæуыл сæххæст, уыдон тыххæй закъондæттынадмæ хаст фæстаг ивддзинæдты фæдыл. 2014 азы хаст æрцыд Хицауады уынаффæ «О повышении привлекательности прохождения военной службы по призыву». Уыцы уынаффæмæ гæсгæ фидаргонд æрцыд, закъонон бындур кæмæн нæ уыд, афтæмæй чи нæ баслужбæ кодта, уыцы граждæнты фарстамæ æркæсыны фæтк. Уыцы фарста лыг кæны сидтон къамис, кæцыйæн йæ бон у рахæссын дыууæ уынаффæйæ иу: 1-аг — æфсæддон билет ын ратгæйæ адæймаджы запасмæ бахæссын, 2-аг — справкæ йын раттын. Уыцы справкæимæ йын 10 азы дæргъы кусыны бар нæ уыдзæн паддзахадон, муниципалон æмæ тыхы структурæты, хъахъхъæнынадон нысаниуæг кæмæн ис, ахæм куыстуæтты.
А. АЛЕКСАНДРОВ
