Горæт Пятигорскы «ТАСС Кавказ»-ы регионалон информацион центры уыд Цæгат Ирыстоны Парламенты Сæрдар ТУСКЪАТЫ Таймуразы пресс-конференци. Ныхасы сæр уыд уалдзыгон парламентон сессийы цæгатирыстойнаг депутатты закъонæвæрынадон архайд. Фарстатæ баст уыдысты ахсджиагдæр закъонæвæрынадон уынаффæтимæ, сæрмагонд æфсæддон операцийы архайджытæн æмæ сæ бинонтæн æххуысы мадзæлттимæ, парламентты ‘хсæн æмархайд æмæ бастдзинæдтимæ, стæй хæстæгдæр рæстæджы нысантимæ.
Тускъаты Таймураз радзырдта йæ архайды тыххæй, ацы бонты Дагестаны чи уыд, Цæгат Кавказы уыцы Парламентон Ассоциацийы Конференцийы, стæй Уæрæсейы Парламентариты Цæгат-Ныгуылæйнаг Ассоциацийы тыххæй дæр æмæ йе ‘ргом аздæхта сæйрагдæр закъонæвæрынадон хъæппæристæ æмæ проекттæм.
– Уæрæсейы Федерацийы субъектты социалон-экономикон æнтыстджын рæзтæн ахъазгæнæг закъонæвæрынадон хъæппæристыл бакусынæн Парламентон ассоциацитæ сты ахсджиаг фæрæзтæ. Ацы ран ис закъонæвæрынадон къабазы фæлтæрддзинадимæ кæрæдзи базонгæ кæныны гæнæн. Иумæ бакусæм, экономикæ æмæ социалон къабазыл хорзæрдæм чи фæзындзæн æмæ сыл комкоммæ чи ахады, ахæм закъонты проекттыл. Равзарæм ахуырады фарстатæ, сбæлвырд кæнæм хъæууонхæдзарадон товаруадзджытæн æххуысы, стæй культурон бынтæ бахъахъхъæныны мадзæлттæ, иу дзырдæй, регионтæн сæ размæцыдæн ахъаз чи у, уыцы хъуыддæгтыл бакусæм, – бафиппайдта Тускъаты Таймураз.
Парламенты Сæрдар уæлдай æргом аздæхта цæгаткавказаг регионы историон-культурон хъæздыг бынтæ бахъахъхъæнынмæ æмæ цæвиттонæн æрхаста Дагестаны республикæйы Национ музей. «Абон махæн тынг ахсджиаг у нæ истори, нæ традицитæ, не ‘гъдæуттæ æмæ нæ сыгъдæг удварн бахъахъхъæнын. Парламентон æмгуыстад кæнгæйæ, ахсджиаг у канд закъонæвæрынад æмæ барадимæ баст уынаффæ хæссын нæ, фæлæ нæ регионты историон бастдзинæдтæ ахуыр кæнын. Уыдон сты нæ фидар иудзинадыл дзурæг æмæ размæцыды сæйрагдæр фæрæз», – бафиппайдта цæгатирыстойнаг Парламенты Сæрдар.
Афæдзы фыццаг æмбисæн хатдзæгтæ кæнгæйæ, Тускъаты Таймураз радзырдта, экономикон домæнтæ æххæст кæнгæйæ, бюджетыл æмæ хъалонты закъонæвæрынадыл куыст куыд цыд, национ проекттæ æххæст кæнынмæ цавæр цæстдард цæуы æмæ Парламенты Советы цæугæ æмбырдты куысты тыххæй.
Хицæн ныхас уыд сæрмагонд æфсæддон операцийы архайджытæн æмæ сæ бинонтæн æххуысы мадзæлттыл. Тускъаты Таймуразы ныхасмæ гæсгæ, депутаттæн ныртæккæ уый у сæ сæйрагдæр архайд. «Ипотекæ райсыны зæрдæмæдзæугæдæр льготæ, кредитон каникултæ, сæрмагонд æфсæддон операцийы сывæллæттæн ахуырады, хъомылады фылдæр уæлæмхасæн зæрдæдарæнтæ, медицинон лæггад, санаторитæ æмæ курорттæм лæвар балцæгтæ – ацы æмæ æндар фарстатимæ баст нормативон-барадон акттæ фидаргонд æрцыд, æмæ куыст цæуы дарддæр æмæ иудадзыгдæр», – загъта Парламенты Сæрдар.
Спикер стыр æргом аздæхта ахуырады къабазмæ. Йæ ныхасмæ гæсгæ, дæсны кусджытæ цæттæ кæнын хъæуы абоны экономикæ æмæ фæллойы базары домæнтæм гæсгæ. Уый тыххæй та хъæуы фæсивæдимæ профориентацион куыст кæнын. Ацы ран ахсджиаг у ахуыргæнæндæтты, муниципалон хицаудзинады оргæнты æмæ бизнесы минæвæрттимæ æмархайд.
Уæрæсейы адæмты иудзинады аз бæрæг кæныны фæлгæты Парламент цавæр хæстæ æххæст кæны, зæгъгæ, ацы фарстæн дзуапп дæтгæйæ, Тускъаты Таймураз радзырдта, «Дорогами дружбы», зæгъгæ, Кæсæг-Балхъары республикæимæ хæрзæрæджы цы егъау форум сарæзтой, уый тыххæй. Ахæм иумæйаг форумтæ саразыны фæнд кæнынц Хъæрæсе-Черкесты республикæимæ, Дагестан æмæ Абхазы республикæимæ дæр. Уымæй уæлдай, Тускъаты Таймураз радзырдта Хуссар Ирыстоны депутаттимæ сын цавæр æмархайд ис, уый тыххæй.
Цæгатирыстойнаг закъонæвæрынадон оргæны разамонæг æрныхас кодта муниципалон реформæ царды рауадзыны сæйраг фæзилæнтыл æмæ, республикæйы районты социалон-экономикон рæзты программæтыл куыст куыд цæуы, ууыл.
Тускъаты Таймураз загъта йæ хъуыды мадæлон æвзаг бахъахъхъæныны фæдыл закъон сфидар кæныны тыххæй дæр. Йæ ныхасмæ гæсгæ, закъон фидаргæнгæ уæд уыдзæн, æмæ æхсæнад иу хъуыдымæ куы æрцæуа. «Закъон адæмы дихтæ нæ, фæлæ сæ иу кæй кæны, уый куы æмбарæм, уæд æй фидар дæр скæндзыстæм æмæ йæ царды дæр рауадздзыстæм», – загъта спикер.
Конференцийы кæронбæттæн Тускъаты Таймураз радзырдта фæззыгон сессийы рæстæг Цæгат Ирыстоны Парламенты архайды тыххæй. Уыцы архайдæн йæ сæйрагдæр уыдзæн ног азмæ республикæйы бюджеты проектыл бакусын. «Фидæны бюджет арæзт цæудзæн, депутаттæ се ‘взарджытимæ фембæлдтыты рæстæг цы фæндæттæ æмæ фиппаинæгтæ хæсдзысты, уыдоны бындурыл. Уымæй уæлдай, фæнд кæнæм, хъалонты политикæ чи аразы, республикон уыцы закъонтæ ногæй равзарын æмæ, ныртæккæ цы хъалонтæ ис, уыдоны ахадындзинадæн аргъ скæнын», – загъта Тускъаты Таймураз.
ДЕДЕГКАТЫ Зæлинæ
