Футболæй дунейы чемпионаты кадæн Екатеринбурджы ацыд кулинарон фестиваль «Кухня сближает народы».
Горæты нациты иумæйаг библиотекæйы æрæвæрдтой 13 фынджы. Фæсарæйнаг спортуарзджыты суазæг кодтой урайлаг хойрагæй, стæй сæ базонгæ кодтой регионы культурон æгъдæуттимæ.
Уырыссаг касæй фæстæмæ уазджытæн уыд ирон чъириты, узбекаг плауы, тæтæйраг эчпочмак æмæ башкираг чакчакы хæрзаддзинад рахатыны фадат. Парахатæй æрæвæрдтой финнаг-урайлаг адæмты хæлц. Мастер-класстæм æрбацæуæг адæмæн амыдтой варениктæ æмæ пряниктæ кæнын. Екатеринбургмæ æрбацæуæг мексикæйаг спортуарзджыты фыццаджыдæр æрбахуыдтой гастрономон бæрæгбонмæ. Ахæм фестивальтæ Астæуккаг Уралы цæуынц рæстæгæй-рæстæгмæ.
— Иунæг бæрæгбон дæр æнæ фынгæй нæ фидауы. Иумæйаг фынг адæмы кæй иу кæны, уымæ гæсгæ ныры хуызæн дзыллон мадзæлттæ нæ библиотекæйы саразæм арæх, — загъта библиотекæйы директор Ольгæ Кузнецова.
ТЕМЫРАТЫ Альбинæ
