Майрæмбоны Хуссар Ирыстоны Тыбылты Алыксандыры номыл Паддзахадон университеты залы кадджын увæры сбæрæг сты Джусойты Нафийы номыл национ премиты лауреаттæ ирон фысджытæ æмæ поэты ‘хсæн литературон конкурсы æмæ, Плиты Грисы номыл премитæ ирон филологийы факультеты студенттæй нысангонд кæмæн æрцыдысты, уыдоны нæмттæ. Мадзалы архайдтой Ирыстоны интеллигенцийы минæвæрттæ, фысджытæ, ахуыргæнджытæ, мыхуыры фæрæзты кусджытæ æмæ студенттæ.
Джусойты Нафийы номыл премийы лауреаттæ систы Чехойты Оля йæ чиныг «Дæуæн Нафи»-йы тыххæй, газет «Рæстдзинад»-ы хистæр уацхæссæг Хетæгкаты Оксанæ Цæгат æмæ Хуссар Ирыстоны адæмон артисткæ, поэт, Хуссар Ирыстоны Парламенты дыууæ æвзæрстытæ депутат Галуанты Людмилæйы цард æмæ сфæлдыстады тыххæй чиныг «Мæ адæм, уæ разы лæууын æз ныфсджынæй», уый тыххæй æмæ Хохойты Энвер йæ æмдзæвгæты чиныг «Хеваст зæрдæ»-йы тыххæй.
Нафийы номыл сæрмагонд премийæ хорзæхджынг æрцыд Ирыстоны иузæрдион хæлар, зындгонд абхазаг поэт æмæ æхсæнадон архайæг Геннади Аламия. У дæсны тæлмацгæнæг, Абхазы Республикæйы Гимны ныхæсты автор. Нафийы номыл преми йын лæвæрд æрцыд абхазаг æвзагмæ Къостайы «Ирон фæндыр» кæй ратæлмац кодта, уый тыххæй. Нафи Геннадий Аламияйæн стыр кад кодта, куыд канд хорз поэт нæ, фæлæ куыд сывæллонау сыгъдæгзæрдæ адæймаг, афтæ дæр.
Геннадий Аламия æрымысыд Нафиимæ сæ хæлардзинады бонтæ, Беслæны скъолайы цы фыдбæлæх æрцыд, уый æмæ цæссыгтимæ каст уыцы цаутыл цы æмдзæвгæтæ ныффыста, уыдон.
– Нафи-иу Абхазы куы уыд, уæд йæ æнкъард цæстæнгасы уыдтон абхазаг адæмы рыст. Хуссар Ирыстоныл уæззау рæстæг куы скодта, уæд дæр йæ цæстыты арфæй зындис йæ уды рис æмæ сагъæс, – загъта Геннадий.
Нæ кадджын уазæгæн Хуссар Ирыстоны зарæггæнджыты къорд «Симд» акодта абхадзаг зарæг.
Бæрæгбоны зæлыдысты Хуыцъейы хъæуы Культурæйы хæдзары зарæггæнджыты къорд «Нартæ»-йы зарджытæ. Йæ разамонæг у Хуыгаты Георги. Акодтой «Нафийы зарæг» дæр. Ныхæстæ ныффыста Челæхсаты Хъазбег. Зæрдæмæхъаргæ зарджытæ акодтой ХИПУ-ы вокалон къорды архайджытæ дæр.
ХИПУ-ы ректор Тедеты Вадим конкурсы архайджытæй Кады гæххæттытæй схорзæхджын кодта Бызыккаты Земфирæйы, Бибылты Русланы æмæ Знауыры скъолайы ирон æвзаг æмæ литературæйы ахуыргæнæг Хъотайты Зæирæйы.
Уæлахиздзаутæн зæрдæбын арфæтимæ сæ лæвæрттæ радтой Республикæ Хуссар Ирыстоны Хицауады Сæрдар Пухаты Эрик, ХИПУ-йы ректор Тедеты Вадим, ЦИПУ-йы ирон филологийы декан Хозиты Барис, Нафийы хо Джуссойтф Клавæ, РЦИ-Аланийы культурæйы министры хæдивæг Дудайты Чермен.
Ирон аив дзырды дæсныты ‘хсæн ацы конкурс цæуы æртыккаг аз. Бындур ын бавæрдта Самарæйы цæрæг не ‘мбæстаг Хуыгаты Ростиславы хæрзаудæн фонд «Амонд», йæ директор у Челæхсаты Хъазыбег.
Нафийы хо Клавæ арфæ ракодта бæрæгбоны архайджытæ æмæ, конкурс чи расидт, уыдонæн. Йæхи къухæй радта, студентты æхсæн ирон аив дзырдмæ дæсныдæр чи разынд, уыдонæн Грисы премитæ. Уыцы арфæйаг кæстæртæ сты ХИПУ-ы студенттæ Нарыкъаты Иринæ (5-æм курсы студенткæ) æмæ Папашвили Александр (4-æм курсы студент). Кады гæххæттытæй хорзæхджын æрцыдысты 4-æм курсы студенттæ Гæджиты Иринæ, Гуызыттаты Иренæ æмæ 2-æм курсы студенткæ Къуылыхты Аннæ.
Нафи æмæ Грис абон дæр не ‘хсæн кæй сты, сæ фарн уæлæуыл кæй баззад, уымæн ирд æвдисæн у ацы зæрдæмæдзæугæ мадзал.
Бæрæгбон цæмæй рæсугъддæр æмæ аивдæр ацæуа, ууыл зæрдиагæй бацархайдта Хуссар Ирыстоны паддзахадон университеты проректор Цхуырбаты Ингæ.
Нæ уацхæссæг
