Нæ зындгонд рапиристкæ, Олимпаг хъæзтыты уæлахиздзау æмæ Дунейы æртæ хатты чемпионкæ Санаты Аидæ ацы аз августы цæудзæн йæ 3-аг Олимпаг хъæзтытæм Бразилийы горæт Риоде-Жанейромæ.
Ацы æхсызгон хабар æрбайхъуыст Кубæйы сæйраг горæт Гаванæйæ ивгъуыд къуыри. Ам фехтованийæ цы дунеон турнир Гран-при цыди, уым бæрæггонд цыдысты, сылгоймæгты ‘хсæн рапирæйæ хæцынæй Олимпаг хъæзтытæм чи бахаудзæн, уыдоны нæмттæ. Уæрæсейы командæйæ иунæг лицензийыл ерыс кодтой Санаты Аидæ æмæ Ларисæ Коробейникова. Гаванæйы Гран-прийы размæ Аидæ Ларисæ Коробейниковайæ 21 очко раздæр цыди, æмæ йын уый тынг фæахъаз æмткæй райсгæйæ йæ сæйраг ныхмæлæууæгæй фæраздæр уæвынæн. Ныр Аидæ йæхи цæттæ кæндзæн Рио-де-Жанейромæ йæ 3-аг Олимпаг хъæзтытæм. Куыд зонæм, афтæмæй Санаты Аидæ 2008 азы Пекины ссис Олимпаг хъæзтыты уæлахиздзау командон ерысты, 2012 азы та Уæрæсейы командæимæ бацахста 2-аг бынат. Аидæйы тренер Къадзты Фиалæ зæгъы: «Олимпаг лицензи райсын ацы аз уæлдай зындæр уыди, уымæн æмæ XXXI Олимпаг хъæзтыты сылгоймæгты ‘хсæн рапирæйæ командон ерыстæ нæ уыдзæн. Уæрæсейæн йæ бон уыд æрмæстдæр дыууæ рапиристкæйы арвитын, æмæ уый тыххæй се ‘хсæн цыди ахъаззаг тох. Фыццаг лицензи æнæкъуылымпыйæ рамбылдта дунейы фароны чемпионкæ Иннæ Дериглазова, æмæ дыккаг лицензи Аидæ кæй рамбылдта, уый нын тынг æхсызгон у. Ныртæккæ нæ сæйраг хæс у нæхи Олимпаг хъæзтыты райдайæнмæ, куыд гæнæн ис, афтæ хуыздæр бацæттæ кæнын». Аидæ лицензи кæй райста, уый стыр æнтыстыл нымайы ССР Цæдисы сгуыхт тренер Людмилæ Щербич дæр: “Стыр æхсызгон мын у, Санаты Аидæ Олимпаг хъæзтытæм лицензи кæй рамбылдта, уый. Ирыстоны чызджытæй ахæм стыр æнтыст фыццагдæр Аидæйæн бантыст, æмæ нæ тынг фæнды, Бразилийæ дæр Олимпаг хæрзиуæгимæ куыд æрбаздæха, уый!” Хуыцаумæ фехъуысæд ацы фæндон, æмæ æцæгдæр фондз мæйы фæстæ Аидæйы ног Олимпаг сгуыхтдзинадæн æвдисæн куыд уæм!
БАСКАТЫ Уырызмæг
