Ирон фæндыры бæрæгбон

0
931

Ивгъуыд цыппæрæмы Сывæллæтты сфæлдыстады республикон галуан æмæ нæ республикæйы Ахуырад æмæ наукæйы министрады хъæппæрисæй уыд æрвылазон «Ирон фæндыры бæрæгбон». Архайдтой дзы æрмæст Дзæуджыхъæуы аивæдты центрты хъомылгæнинæгтæ нæ, фæлæ районты минæвæрттæ дæр. Бæрæгбон цыд дыууын фæндзæм хатт. Бындур ын сæвæрдта Сывæллæтты сфæлдыстады галуаны директор Гуыцмæзты Аннæ. Уал азы дæргъы вæййы уалдзæджы, æмæ йæ сæйраг нысан у сылгоймæгты зæрдæ барухс кæнын. Фæндыры аив цагъды фæрцы сывæллæтты фæфæнды раарфæ кæнын æппæт сылгоймæгтæн дæр. Æмæ сын, кæй зæгъын æй хъæуы, æнтысгæ дæр бакæны. Бæрæгбон байгом кодтой дзæнæтыбадинаг Хуытыгаты Хъазыбеджы аив хъæлæсæй фыст æмдзæвгæ «Ирон фæндыр»-æй.

Бæрæгбон амыдта зарæггæнæг Зæнджиаты Мæдинæ. Уый цалынмæ фыццаг цагъды бар нæ радта, уæдмæ уазджытæ æмæ фысымтæн цыбырæй радзырдта ацы бæрæгбоны тыххæй. Уый фæстæ фыццаг цагъды бар радта «Мелодии гор»-ы ансамблæн. Уыдон сæ аив цагъдæй барухс кодтой адæмы зæрдæтæ. Сæ фæстæ та — иннæ къордтæ. Колыты Аксойы номыл дины семинары хъомылгæнинæгты, къорд «Чырыстон скъола»-йы архайджытæ хæрзаивæй, инсценировкæйы хуызы равдыстой, ирон адæмы царды фæндыр цы ахадгæ бынат ахсы, уый. Фæндыры фæрцы кæй ис раргом кæнæн алыхуызон адæймаджы зæрдæйы æнкъарæнтæ дæр. Ацы бæрæгбонæн йæ æппæты хуыздæр миниуæг ис уый мидæг, æмæ дзы уæлахиздзаутæ нæ февзарынц, æмæ сывæллæттæ кæрæдзимæ хæлæг нæ фæкæнынц. Ам та фæндырдзæгъдджытæ кæрæдзиуыл иууылдæр афтæ цин кодтой, цыма иу къорд сты. Уый та у æппæты ахсджиагдæр æмæ хъæугæдæр. Рæзгæ фæлтæр хъуамæ кæрæдзимæ гæсгæ хорзыл ахуыр кæной. Уæлдайдæр та, аивадимæ баст куы уа, уæд. Чеджемты Æхсары загъдау: “…Æрттив уæдæ, сыгъзæрин хур, нæ сæрмæ, Нæ Иры цин цыхцырджытæй кæлæд! Фæндырдзагъдæй у амондджын мæ зæрдæ, Нæ ирон бæстæ амондджындæр уæд!”

КАСАТЫ Аслæнбег

Къамтæ систа КЪÆБЫСТЫ Харитон

ОСТАВЬТЕ ОТВЕТ

Please enter your comment!
Please enter your name here