Кинойы аз — Ирыстоны

0
989

2016 аз, УФ-йы Президент Владимир ПУТИНЫ уынаффæмæ гæсгæ, нымад у Кинойы азыл. Йæ нысан у нæ бæстæйы киноаивад бæрзонд сисын æмæ киноисджытæн киноаивады базармæ рацæуынæн хъæугæ уавæртæ скæнын. Куыд Цæгат Кавказы иннæ республикæтæ, афтæ Ирыстон дæр йæ зæрдæ дары æмæ дзы ныфс ис национ киноаивады ног уд кæй бацæудзæн æмæ æнхъæлмæ кæсы цæхгæр ивддзинæдтæм

Цæгат Ирыстонæн ис хъæздыг æмæ мидисджын киноиндустрийы истори. Цæгат Кавказы иннæ регионты ‘хсæн æппæты фыццаг кинотеатр дæр Ирыстоны байгом. Уый уыд 1907 аз. Кинотеатр хуындис «Синематограф братьев Пате», абон та нæ республикæйы цæрджытæн зонгæ у куыд кинотеатр «Комсомолец». Бирæ азты дæргъы Цæгат Кавказы киностуди уыд Дзæуджыхъæуы. Æмæ дзы цы диссаджы кинонывтæ систой æмхæларæй! Кинойы азимæ баиу ис не ‘мзæххон Уæрæсейы æмыр киноты фыццаг ирæттæй цы артисттæ ахъазыдысты, уыдонæй иу зындгонд артист Бестауты Ладо сæйраг ролы цы кинонывы ахъазыд «Абрек Заур», уый уæрæх экранмæ рацыды юбилеимæ. Цæгат Ирыстоны Кинойы азы фæдыл сарæзтой оргкомитет. Ныридæгæн фæнысан кодтой афæдзы дæргъы цы бæрæгбæттæ, фембæлдтытæ, мастер-класстæ, конференцитæ уыдзæн, уыдон. Фыццаг къахдзæфæй абон кадджын уавæры Тæбæхсæуты Балойы номыл Ирон академион театры 8 апрелы 18 сахатыл байгом уыдзæн Кинойы аз. Уый фæдыл знон театры уыд пресс-конференци. Архайдтой дзы РЦИ-Аланийы культурæйы министры хæстæ рæстæгмæ æххæстгæнæг Атайты Мæдинæ, РЦИАланийы Кинематографистты цæдисы сæргълæууæг Гулуты Вячеслав, киноиртасæг Чъерджиаты Индирæ, Кинойы азы бæрæгбоны режиссер-æвæрæг Гæлæуты Аслæнбег, продюсер, медиакъорд «Ярче»-йы аивадон разамонæг Æлбегаты Артур æмæ Уæрæсейы киноаивады ирон æрыгон курдиатджын артисттæ Фидараты Сослан, Дыгъуызты Алан, Гогаты Нинæ, Хъайырты Зæринæ. Кинойы азы байгомы бæрæгбонмæ Ирыстонмæ ссæудзысты кадджын уазджытæ, Цæгат Кавказы кинематографийы зындгонд артисттæ Дагун Омаев æмæ Руслан Фиров. Концертон программæйы архайдзысты Сæлбиты Аким, Тайсауты Олег, Къаболаты Лизæ, Гуыбиаты Эльбрус, Виктория Бабаева, Паддзахадон филармонийы национ уадынгæрзты оркестр æмæ симфонион оркестр, Суанты Кимы номыл паддзахадон национ оркестр. Равдисдзысты скъуыддзæгтæ нæ уарзон рагон кинонывтæй, азардзысты кинонывтæй ист адæмæн уарзон зарджытæ, фембæлдзысты артисттимæ.

ХЕТÆГКАТЫ-УАНИТЫ Оксанæ

Къам систа КЪÆБЫСТЫ Харитон

ОСТАВЬТЕ ОТВЕТ

Please enter your comment!
Please enter your name here