Знон Дзæуджыхъæуы Барбашовы уынджы Тугдæттæн станцæйы рæзты райсомæй сихоры онг фæсивæдæй, транспортæй ацæуæн нæ уыд — туг раттынмæ ардæм æрбацыд тынг бирæ адæм. «От сердца к сердцу», зæгъгæ, ахæм донорон эстафетæйы фæлгæты уыцы бон Дзæуджыхъæуы арæзт æрцыд донорон акци.
Алы аз дæр 20 апрелы вæййы Доноры дунеон бон, æмæ уыцы бонимæ, стæй Æнæниздзинады дунеон бонимæ баст æрцыд ацы хорз хъуыддаг. Эстафетæ цæудзæн 7-28 апрелы, райдыдта Цæцæны Республикæйы æмæ аххæсдзæн Цæгат Кавказы æппæт субъекттыл. Амæй размæ Уæрæсейы Федерацийы Президенты Æххæстбарджын минæвар Цæгат Кавказы федералон зылды Сергей Меликовы номыл æрбацыд курдиат Цæцæны Республикæйы Фæсивæды хъуыддæгты министрадæй, цæмæй сын Сергей Меликов баххуыс кæна Æппæткавказы донорон эстафетæ саразынæн. Цæцæны Республикæйæ уæлдай эстафетæ ныридæгæн арæзт æрцыд Дагестан æмæ Мæхъæлы æмæ ацы бонты æрбахæццæ Цæгат Ирыстонмæ. Дарддæр йæ фæндаг уыдзæн КæсæгБалхъармæ, Хъæрæсе-Черкесты Республикæмæ æмæ Стъараполы краймæ. Тугдæттæн станцæйы донорон хайады сæргълæууæг Кцойты Каринæ нын куыд радзырдта, афтæмæй, станцæ райсомæй йæ куыст куы райдыдта, уæдæй сахаты ‘рдæгмæ туг радтой 25 адæймаджы. Иу 10 адæймаджы та ма уыцы рæстæгмæ туг радтой, станцæйы раз уынджы цы цæугæ мобилон комплекс лæууыд, уым. Цæгат Ирыстоны ахæм акци арæзт цæмæй æрцæуа, уымæн цæстуарзон æххуыс бакодтой нæ республикæйы Фæсивæды хъуыддæгты министрад, хæрзаудæн фонд «Быть добру», æхсæнадон организаци «Иры фидæн», Уæрæсейаг Сырх Дзуар æмæ Медицинон профилактикæйы республикон центр. Ацы Центры дохтыртæ аппаратон-программон комплекс «Армис»-ы фæрцы туг раттыны размæ алкæмæн дæр бæрæг кодтой йе ‘нæниздзинады уавæр. Се ‘ппæтæй раздæр туг раттынмæ чи æрбацыд, уыцы фæсивæды ‘хсæн уыдысты Дзæуджыхъæуы 17æм базарадон-кулинарон лицейы, 3-æм æмæ 5-æм училищеты ахуырдзаутæ, стæй Цæгат Кавказы хæххон-металлургон институты, Хæххон паддзахадон аграрон университеты, Цæгат Ирыстоны паддзахадон университеты æмæ Цæгат Ирыстоны паддзахадон медицинон академийы студенттæ. Туг раттын æмæ уымæй тыхст рынчынæн баххуыс кæнын стыр ахсджиаг хъуыддаг кæй у, уый не ‘ппæт дæр куыннæ зонæм. Фæлæ йæ алчидæр йæхиуыл цалынмæ нæ банкъара, уæдмæ уыцы ахсджиагдзинад уæддæр æххæстæй не ‘мбары. Æмæ хæрзаудæн фонд «Быть добру»-йы президент, нæ фæсивæды минæвæрттæн сæ хуыздæртæй иу Хъуысаты Амырхан куыд загъта, афтæмæй сæ хæс у уыцы ахсджиагдзинад адæмæн æмбæрын кæнын, цæмæй зоной — туг раттынæй канд рынчынæн кæй не ‘ххуыс кæнынц, фæлæ сæхи æнæниздзинадæн дæр уый пайда кæй у, стæй у æдас медицинон мадзал. Дыууæ мæйæ дыууæ мæймæ фонд «Быть добру» аразы ахæм акци ахуырдзау фæсивæды ‘хсæн æмæ уымæй æххуыс кæны Тугдæттæн станцæйæн. Амырханы ныхасмæ гæсгæ, æрыгæтты, 23-аздзыд ахуырдзау фæсивæды ‘хсæн ис ахæмтæ, æмæ ныридæгæн туг дæс æмæ уымæй фылдæр хатты чи радта. Уыцы бон туг чи радта, уыдоны нымæц, куыд базыдтам, афтæмæй 100-йæ ахызт. Фæлæ, æнæмæнг, хорз уаид, ацы хъуыддагмæ адæм разæнгард куы уаиккой канд Доноры бон нæ, фæлæ алкæддæр. ДЕДЕГКАТЫ Зæлинæ
