Терроризмы ныхмæ тохы æмзонды тыххæй Евгений Вахтанговы номыл уырыссаг академион театры нæ республикæйы скъоладзаутæ æмæ студенттæн равдыстой Михаил Рощины зындгонд пьесæмæ гæсгæ æвæрд спектакль «Эшелон».
Æртæ боны дæргъы хæстон драмæмæ бакастысты 300 æрыгон адæймагæй фылдæр. Се ‘хсæн – Дзæуджыхъæуы 11-æм астæуккаг скъолайы, Цæгат Кавказы суворовон училищæйы хъомылгæнинæгтæ æмæ Дзæуджыхъæуы электронон техникумы студенттæ. Спектакль равдисыны мадзал арæзт цыдис терроризмы ныхмæ тохы фæлгæты. Цæгат Ирыстоны ацы бон се ‘ппæтмæ дæр уæлдай æрхæндæг æнкъарæнтæ æвзæрын кæны. Зæрдылдарæн бон баст у 2004 азы сентябры трагикон цаутимæ, Беслæны скъолайы уæд фыдгæнджыты азарæй бацарæфтыд сты мин адæймагæй фылдæр æнаххос сывæллæттæ, ныййарджытæ æмæ
ахуыргæнджытæ.
Спектакль «Эшелон» хуымæтæджы æвзæрст не ‘рцыд. Уым ныхас цæуы, тæссаг мæлæты цæсгоммæ комкоммæ кæсгæйæ, адæм уæддæр сæ зæрдæтæ æмæ удты адæймаджы хуыздæр миниуджытæ куыд бахъахъхъæдтой, кæрæдзимæ уарзондзинад сæ куыд æрбангом кодта, ахæм историон мидисыл.
Саутæты Тамилæ
