Нæ республикæйы сæйраг спортивон галуан «Манеж»-ы дарддæр цæуы Уæрæсейы чемпионат уæззау атлетикæйæ. Бонæй-бонмæ ерыстæ кæнынц цымыдисагдæр. Уæззау штангæимæ тохы чи бацæуы, уыцы чызджытæ æмæ лæппутæ æвдисынц æцæг хъæбатырдзинад. Уый дисы бафтауы трибунæты бадæг спортуарзджыты æмæ уыдон сæ къухæмдзæгъдæй аргъ кæнынц штангистты архайдæн.
Æцæгæй дæр, куыннæ у диссаг: 53 килограммы уæзы чызг Еленæ Сухарь 112 килограммы (ома, йæхицæй 2 хаттæй фылдæр чи ласы, ахæм уæз) сысхуыста йæ сæрмæ! Уымæй æрмæстдæр 1 килограммы къаддæр бантыст сисын Светланæ Черепановайæн. Ацы уæзы Еленæ Сухарь дыууæ хуызы истæй равдыста 196 кг (84+112) æмæ бацахста 1-аг бынат. Светланæ Черепановайæн бантыст сисын 195 кг (85+110) æмæ рацыд 2-аг бынатмæ. Æртыккаг бынат ацы уæзы бацахста Ольгæ Голованова (175 кг). Афтæмæй Ольгæ Сухарь сыгъзæрин майдан æрхаста Ямал-Ненецкы автономон зылдæн, Светланæ Черепанова йæ æвзист майданæй фæхъæздыгдæр кодта Мæскуы æмæ Курганы областы, Ольгæ Головановайы бронзæ майданыл та бацин кодтой Мæскуы æмæ Нижний Новгород. Уыцы бон ма сылгоймæгты ерысы сбæрæг сты 58 килограммы онг уæзы уæлахиздзаутæ æмæ призертæ. 1-аг бынатмæ рацыди фæлтæрдджын спортсменкæ, Наталья Гришина Республикæ Мордовийæ. Наталья дыууæ хуызы систа 197 кг (88+109), 2-аг бынат бацахста Иринæ Баймулкина (Мæскуы + Чувашты Республикæ) равдыста 194 кг (87+107). 3-аг бынатыл æрлæууыд удмуртаг спортсменкæ Амалья Ганбарова — 190 кг (82+108). 25 майы ерыс кодтой нæлгоймæгтæ 69 кг уæзы. Ам рагагъоммæ бæрæг уыд, 1-аг бынатыл краснодайраг спортсмен Олег Ченимæ ерыс кæнын зын кæй уыдзæн, уый. Æмæ æцæгæйдæр, Олег 1-аг бынат рамбылдта йæ ныхмæлæуджытæй зынгæ фылдæр сисгæйæ. Ноджы ма Олег Чен ахъавыд уыцы-иу истæй йæхи уæрæсейаг рекорд фæфылдæр кæнын, фæлæ йын ацы хатт нæ бантыст. Дыууæ хуызы систа 336 кг (158+178). 2-аг бынат бацахсæг новосибирскаг штангист Максим Коноплевæн бантыст 295 кг (135+160) сисын. Мæскуыйаг Александр Куварин æмæ ростоваг Тимур Орликов та систой æмхуызон уæз — 292 кг. 26 майы ерыстæ цыдысты сылгоймæгты ‘хсæн 63 æмæ 69 килограммы онг уæзты, нæлгоймæгтæ та сæ хъару æвзæрстой 77 кг уæзы. 63 кг уæзы цы сылгоймæгтæ рацыд 1-аг бынатыл ерыс кæнынмæ, уыдоны ‘хсæн уыдысты æртæ ирон чызджы: дунейы чемпионкæ Тъуриты Тимæ, Хъайтыхъты Аллæ æмæ Мерденты Кристинæ. 18-аздзыд Мерденты Кристинæ ерысты архайдта Стъараполы крайы номæй. Тъуриты Тимæйæн йæ сæйрагдæр ныхмæлæуджытыл нымад уыдысты Европæйы чемпионкæ Наталья Хлесткина (Мæскуы+Чувашты Республикæ) æмæ Татьянæ Алеева (Кемеровы област). Ерыстæ куыд рауадысты, афтæмæй Тимæ йæ ныхмæлæуджытæй разынд зынгæ тыхджындæр. Тимæ фæуæлахиз штангæ уыцы-иу ист кæнгæйæ (105 кг) æмæ риуæй æсхойгæйæ дæр (135 кг). Дыууæ хуызы истæй уый у 240 кг. Йæ ныхмæлæуджытæй 2-аг бынат чи бацахста, Татьянæ Алеева, уый равдыста 15 кг къаддæр — 225 кг (100+125). Европæйы чемпионкæ Наталья Хлесткинайæн бантыст æрмæстдæр 3-аг къæпхæнмæ схизын, 224 кг (101+123) — уыйбæрц уыди йæ бæрæггæнæн. Уæрæсейы сгуыхт тренер Золойты Хъазыбег йæ хъомылгæнинаджы уæлахизы тыххæй загъта: «Тимæ кæд зынгæ фылдæр систа йæ ныхмæлæуджытæй, уæддæр йæ бон уымæй фылдæр равдисын хъуамæ уа. Æппынкъаддæр нæ абонæй 10-15 килограммы фылдæр сисынмæ цæттæ уæвын хъæуы Олимпаг хъæзтыты ерысты. Цы дыууæ мæйы ма нын ис, уыцы рæстæг кусдзыстæм ууыл». Уыцы изæр ма ерыс кодтой 69 килограммы онг уæз сылгоймæгтæ æмæ 77 килограммы онг уæзы нæлгоймæгтæ. Уæлахиздзаутæ сбæрæг сты, нæ газеты номыр мыхуырмæ фыст куы æрцыд, уый фæстæ. 27 майы ерысты архайдзысты 75 кг æмæ +75 кг уæзы сылгоймæгтæ æмæ 85 килограммы онг уæзы нæлгоймæгтæ. Уыдонимæ сты Мстиаты Дианæ (+75кг), Дмитрий Петров æмæ Александр Сафарян.
БАСКАТЫ Уырызмæг
