Цæгат Ирыстоны агропромышленнон комплексы райрæзты фарстатæ

0
764

Республикæ Цæгат Ирыстон-Аланийы Сæргълæууæджы хæстæ рæстæгмæ æххæстгæнæг БИТАРТЫ Вячеславæн Мæскуыйы цы кусæг фембæлдтытæ уыд, уыдонæй иу ацыд Уæрæсейы Хъæууон хæдзарады министрады. Министр Александр ТКАЧЕВИМÆ Битары-фырт æрныхас кодта республикæйы агропромышленнон комплексы райрæзты фарстатыл.

Республикæйы разамонæг йæ раныхасы куыд фæбæрæг кодта, афтæмæй республикæ цæттæ у федералон программæты архайынмæ. Уыимæ, йæ хъуыдымæ гæсгæ,фаг пайдагонд нæ цæуы республикæйы хæххон территоритæй — уым ис 100 мин гектарæй фылдæр фосхизæнтæ. «Мах хорз æмбарæм, ног технологитæ æмæ агротехникон мадзæлттæ хуыздæрæрдæм кæй сахаддзысты фосдарынады къабазыл, уый, æмæ уымæ тырнæм. Фæлæ хъæууонхæдзарадон продукцийы рауагъдыл æвзæрæрдæм зынынц алыхуызон æууæлтæ — республикæйы экономикæйы уæззау уавæр, хомагкусæг инфраструктурæ кæй нæй, стæй æрдзы фæзындтытæ: тыхджын къæвдатæ, ихуарынтæ кæнæ хус рæстæджытæ. Æппæт уыцы æууæлтæ хынцгæйæ, республикæйы хъæууонхæдзарадон къабазæн хъæуы уæлæмхасæн паддзахадон æххуыс», — загъта Битарты Вячеслав. Федералон министр æмæ регионы разамонæг куыд фæнысан кодтой, афтæмæй хъæууон хæдзарады къабазы архайд зынгæ фæхъомысджындæр кæнæн ис, хомагкусæг инфраструктурæйы объекттæ аразгæйæ. Александр Ткачев зæрдæ бавæрдта, республикæйы Сæргълæууæг министрадмæ цы инвестицион проекттæ балæвæрдта, уыдонмæ лæмбынæг кæй æркæсдзысты, уымæй. «Кæд нæ экономикæ къуырцдзæвæны ис, уæддæр агропромышленнон комплексы иуæй-иу къабæзты райрæзтæн Цæгат Ирыстоны ис хорз фадæттæ. Ныфс мæ ис, ацы фембæлд нæ дарддæры æнгом æмгуыстадæн ахъаз кæй фæуыдзæн, уымæй», — бафиппайдта хъæууон хæдзарады министр. Фембæлды архайджытæ сæрмагонд æргом аздæхтой, хъæууон территоритæ æмæ хъæууон адæмы царды уавæртæ фæхуыздæр кæнынæн кæй сарæзтой, уыцы федералон программæтæ æххæст кæныны фарстамæ дæр. Битарыфырты ныхасмæ гæсгæ, уыцы программæты мадзæлтты фæрцы æрыгон специалисттæ се ‘ргом аздахдзысты аграрон къабазмæ, стæй хъæутæй горæттæм чи лидзы, уыцы нымæц къаддæр кæндзæн.

 

РЦИ-Аланийы Сæргълæууæджы æмæ РЦИ-Аланийы Хицауады пресс-службæ

ОСТАВЬТЕ ОТВЕТ

Please enter your comment!
Please enter your name here