Сабаты, 20 августы, Беслæны кадджын уавæры байгом ног спортивон комплекс.
Ацы стыр спортивон агъуыст (йæ фæзуат — 1862 квадратон метры) арæзт æрцыд федералон программæмæ гæсгæ. Йæ байгом кæныны бон ардæм æрбацыдысты сæдæгай адæймæгтæ: æрыгон спортсментæ, ныййарджытæ, нæ зындгонд спортсментæ, Олимпаг хъæзтыты уæлахиздзаутæ Андиаты Сослан, Таймазты Артур, Богъиты Вадим, Бæройты Хасан, дунейы, Уæрæсейы æмæ Европæйы чемпионтæ Æлдаттаты Ибрагим, Денис Царгуш, Тотраты Рустам, Фидараты Аслан, Кцойты Сослан æмæ ма бирæ зындгонд спортсментæ. Спорткомплексæн лæвæрд æрцыд дунейы цыппар хатты чемпион, Олимпаг хъæзтыты дыууæ хатты призер Къудухты Бесичы ном. Спортивон галуанмæ бацæуæны раз, кæрты æвæрд æрцыд Бесичы скульптурон цыртдзæвæн. Сæ гом кæныны мадзалмæ Беслæнмæ æрбацыдысты: РЦИ-Аланийы Сæргълæууæджы хæстæ рæстæгмæ æххæстгæнæг Битарты Вячеслав, нæ республикæйы Хицауады Сæрдары хæдивæджы хæстæ рæстæгмæ æххæстгæнæг Александр Реутов, Олимпаг чемпионтæ Андиаты Сослан, Таймазты Артур, Бæройты Хасан, Къудухты Бесичы бинонтæ… Бесичы цыртдзæвæн гом кæнгæйæ, Битарты Вячеслав загъта: «Абон ам цы цау æрцыд, уый канд Беслæныхъæуы хорздзинад нæу, фæлæ у нæ республикæйы иумæйаг хорздзинад. Нæ спортсментæ Ирыстоны ном æгас дунейы дæр кадимæ кæй хæссынц, уый нæ иумæйаг хъæздыгдзинад у. Абон ам цыртдзæвæн гом кæнæм нæ æмбисондæн хæссинаг, нæ уарзон кæстæр Къудухты Бесикæн. Бесик спорты кæд цыфæнды стыр бæрзæндтæм схызт, уæддæр баззад æвæджиауы хуымæтæг æмæ æфсармджын кæстæрæй. Уый тыххæй йæ мах уæлдай уарзт кодтам. Бесик нæ кæстæртæн уыди æмæ хъуамæ уа фæзминаг, куыд спортсмен æмæ ирон æгъдаухæссæг адæймаг. Бесичы номыл абон цы Спортивон галуан гом кæнæм, уым та фидæны дунейы æмæ Олимпаг хъæзтыты уæлахиздзаутæ куыд байрæзой, уый Хуыцау зæгъæд». Уый фæстæ Битарты Вячеслав, Андиаты Сослан, Таймазты Артур, Бæройты Хасан Рахизфарсы районы администрацийы сæргълæууæджы хæстæ рæстæгмæ æххæстгæнæг Беркъаты Константин Къудухты Бесичы скульптурон цыртдзæвæны æмбæрзæн куы байгом кодтой, уæд адæм сæ къухæмдзæгъдæй бузныг загътой йæ саразджытæн. Битарты Вячеслав æмæ Бесичы чысыл фырт Георги, уый хæдфæстæ алыг кодтой Спортивон комплексмæ бацæуæны сырх лент æмæ бæрæгбонмæ æрбацæуджытæ бацыдысты ног спортивон бæстыхаймæ. Ам уыцы бон арæзт æрцыд Къудухты Бесичы номыл командон турнир уæгъдибар хъæбысхæстæй. Архайдтой дзы Рахизфарсы, Горæтгæрон, Æрæфы районты æмæ Андиаты Сосланы номыл хъæбысхæсты скъолайы командæтæ. Ерыстæ рауадысты цымыдисаг æмæ ахицæн сты Рахизфарсы богæлтты уæлахизæй.
БАСКАТЫ Уырызмæг
