Ивгъуыд æртыццæджы, Хæххон паддзахадон аграрон университеты Культурæйы галуаны уыд сывæллæтты сфæлдыстады æппæтуæрæсеон фестиваль-конкурс «Дзæнхъа стъалытæ»-йы регионалон æркаст. Уый вæййы æрвылаз дæр тæрхондæтты пъырыстыфты федералон службæйы республикон управленийы кусджыты хъæппæрисæй. Æмæ дзы сæ курдиат кафынæй, зарынæй æмæ музыкалон инструменттыл цæгъдынæй февдисынц алы кары сывæллæттæ. Конкурсы нысан у фæсивæды курдиат раргом кæнын æмæ сын йæ рæзтæн æмбæлгæ уавæртæ аразын, стæй сын се ‘ргом аивадмæ æмæ культурæмæ аздахын.
Ацы хатт дæр конкурсы архайын бирæ рæзгæ фæсивæды бафæндыд. Сæ курдиатæн та сын аргъ кодтой жюрийы уæнгтæ: Дзæуджыхъæуы Гергиты Валерийы номыл аивæдты колледжы ахуыргæнæг, УФ-йы культурæйы сгуыхт кусæг Бæцæзаты Светланæ, Дзæуджыхъæуы, сывæллæтты аивадон скъолайы директор Хестанты Земфирæ, Дзæуджыхъæуы Гергиты Валерийы номыл аивæдты колледжы ахуыргæнæг Иринæ Иванова, Дзæуджыхъæуы бынæттон хиуынаффæйады администрацийы культурæйы управленийы сæйраг специалист Карсанаты Адæ, хореограф Калоты Азæмæт æмæ барадон органты бæрнон кусæг Брциаты Олег. Жюрийы хатдзæгтæм гæсгæ фестиваль-конкурсы фыццаг бынæттæ (хореографийы номинацийы) бацахстой адæмон кафты ансамбльтæ «Ирыстоны æвзонгдзинад»-ы æмæ «Дзæуджыхъæуккаг алантæ»-йы (ацы ансамбль ма райста фестивалы сæйраг приз дæр) курдиатджын кафджытæ. Вокалон аивады номинацийы фыццаг бынæттæ саккаг кодтой Джиоты Софияйæн, Мария Козловайæн æмæ Айлараты Илонæйæн. Музыкалон инструменттыл цæгъдынæй фестивалы архайджытæй уæлдай арæхстджындæр æмæ сæрæндæр разындысты æмæ фыццаг бынат бацахстой Гаджиты Мария, Алинæ Буран, Тедеты Азæмæт, Лианты Регинæ, Джиоты Анжелæ æмæ инструменталон ансамбль «Далафæндыр»-ы архайджытæ. Ныр уæлахиздзаутæ сæрды ацæудзысты сывæллæтты Æппæтуæрæсеон центр «Орленок»-мæ. Æмæ Ирыстоны кад хъахъхъæндзысты Æппæтуæрæсеон фестивалы.
АНВАРАТЫ В.
Къамтæ систа ЦÆГÆРАТЫ Дауыт
