Æнтыстдзинæдтимæ æрбаздæхтысты Хъырымæй

0
427

 

Сывæллæтты, æрыгæтты æмæ профессионалон сфæлдыстадон фестиваль «Берега надежды»-йæн бындур æвæрд æрцыд 1973 азы. Уæдæй абонмæ дзы æрвылаз дæр архайдтой æмæ архайынц музыкалон æмæ театралон аивады хуыздæр хихъæппæрисадон къордтæ. Ацы мадзал хуымæтæджы арæзт нæ цыд советон цардарæзты. Ахæм фестивальтæ æмæ конкурсты фæрцы-иу сбæрæг кодтой курдиатджын адæймæгты

2002 азæй дзы архайы Ирыстоны Тарскæйы хъæуы клубы адæмон театры хихъæппæрисадон къорд дæр. Уыимæ, спектакльты архайынц хъæуы администрацийы æмæ клубы кусджытæ. Проекты хыгъды кæдæй сты, уæдæй абонмæ сæ къухы бирæ æнтыстдзинæдтæ бафтыд. Бæлвырддæр нын сæ радзырдта клубы аивадон разамонæг Кобылты Верæ:

— Дæс æмæ ссæдз азы кусын клубы, æмæ нæм уыцы рæстæг бирæ курдиатджын хорз аивадон коллективтæ уыдис. Фæлæ, фæстаг дæс азы театралон аивæдты фестивалы æртæ хатты райстам сæйраг «Гран-При». 2002 азы фыццаг хатт Таганрогмæ ацыдыстæм, æмæ нын саккаг кодтой фыццаг къæпхæны лауреаты ном. Уыдыстæм Лазаревскоейы, Сочийы, Анапæйы. Ацы аз та уыдыстæм Хъырымы. Æмæ та нын фыццаг къæпхæны лауреаты ном саккаг кодтой. Лæвæрд нын æрцыд Кады гæххæттытæ æмæ кубоктæ, — дзуры Кобылты Верæ. — Режиссерæй нæм кусы Гæдзауты Георги. Курдиатджын лæппу сæвæрдта спектакль «Нæ фехъуыстон ма зæгъ». Иунæг профессионалон артист дæр нæм нæй. Иууылдæр сты хæдахуыр артисттæ. Рольты архайдтой: клубы директор Джусойты Зоя, Езеты Майрæм, Гæдзауты Георги, Малиты Индирæ, Гатыгкоты Светæ, Тыбылты Людæ, мæхæдæг, Багаты Арсен, Кобылты Зæринæ. Нæ къордæн концертмейстер у Тауытты Арсен. Жюрийы уæнгтæ та алы аз вæййынц УФ-йы зындгонд артисттæ æмæ аивады сгуыхт архайджытæ.

Хъырымы ныл тынг зæрдиагæй сæмбæлдысты. Жюрийы сæрдар — УФ-йы сгуыхт артист Сергей Гамов нæ къордæй тынг разыйæ баззад. «Это единственный коллектив, который предоставил нам специальную программу и аннотацию. Этот коллектив я сравниваю с МХАТ-ом», — загъта Сергей Гамов. Стыр цымыдисæй нын кастысты нæ национ уæлæдарæсмæ дæр.

Алы аз дæр фестивальмæ аласæм ног спектакль. Нæ репертуар хъæздыгæй-хъæздыгдæр кæны, кусæм, архайæм, цæмæй сценæмæкæсæг ра- зыйæ баззайа, цавæрдæр æхсызгондзинад банкъара, ууыл, — загъта Верæ.

Тарскæйы клубы адæмон театры архайджытæ кæд профессионалон артисттæ не сты, уæддæр зæрдæйæ аивадимæ баст сты, аргъ кæй куыстæн кæнынц æмæ зæрдиагæй бакæсынмæ кæмæ фæтагъд кæнынц, ахæм коллектив. «Нæ усгур алыгъд», «Цола», «Нæ фехъуыстон ма зæгъ», «Софьяйы зарæг», «Пæсæйы фæндон» æмæ æндæр спектакльтæ Уæрæсейы алы горæтты кæд æвдыстой ирон æвзагыл, æнæ тæлмацæй, уæддæр сценæмæкæсæгæн сæ хъазты фæрцы зын бамбарæн нæ вæййы спектаклы мидис. Уымæй ма сæ алы уацмысæн дæр бацæттæ кæнынц аннотаци. Æппæтадæмон фестиваль «Берега надежды»-йы тынг бирæ аивадон къордтæ фæархайы, æмæ се ‘хсæн сæйраг бынат райс, уый чысыл кад нæу Ирыстонæн. Ныр та кусын райдыдтой спектакль «Усгур Гаци» сценæйы сæвæрыныл æмæ йæ уæлдæрамынд фестивалы жюри æмæ театрдзауты размæ рахæссыныл. Сæ къухы радон æнтыстдзинæдтæ кæй бафтдзæн, ууыл нæ зæрдæ дарæм.

Тарскæйы клубы адæмон театры аивадон разамонæг Кобылты Верæ та бузныг зæгъы, фестивальмæ ацæуыны хъуыддаджы сын чи баххуыс кодта, уыдонæн — клубы директор Джусойты Зояйæн æмæ хъæуы администрацийы сæргълæууæг Соттиты Эльбрусæн.

САУТÆТЫ Тамилæ

ОСТАВЬТЕ ОТВЕТ

Please enter your comment!
Please enter your name here