Абон Хъуылаты Бадзийы номыл спортивон галуан «Манеж»-ы райдыдтой нæ республикæйы Сæргълæууæг БИТАРТЫ Вячеславы хъæппæрисæй арæзт дунеон турнир «Аланты Кубок» рамбулыныл ерыстæ.
Гауызыл сæ хъару æмæ арæхстдзинад æвдисынц, æгас дунейы дæр хъуыстгонд чи у, ахæм богæлттæ. Уæрæсейæ уæлдай сæ тыхджындæр богæлтты æрбарвыстой Азербайджан, Белорусси, Болгари, Гуырдзыстон, Казахстан, Молдави, Мангол, Итали, Словаки, Сомих æмæ Узбекистан. Абон сбæрæг уыдзысты уæлахиздзаутæ 57, 65, 74 æмæ 97 килограммты онг уæзты. Райсом та гауызмæ рацæудзысты иннæ цыппар уæзы хæцæг богæлттæ (61, 70, 86, 125 кг). Ноджыдæр ма иу цымыдисаг ерыстæ 16 ноябры райдыдтой Дзарасаты Саукуыдзы номыл спортивон комплексы. Ам аивадон гимнастикæйæ РЦИ-Аланийы Кубок рамбулыныл ерысты архайынц 300 спортсмены. Ирыстоны чызджытæй уæлдай турниры сæ арæхстдзинад æвдисынц Волгоград, Краснодар, Кисловодск, Маркс, Налцыкк, Нижневартовск æмæ Нефтекумскы гимнасткæтæ. Ерыстæ ахæсдзысты æртæ боны. Абон, 18 ноябры, сбæрæг уыдзысты уæлахиздзаутæ хицæн спортсменкæты ‘хсæн, райсом та сбæлвырд уыдзæн Кубок рамбулæг командæты ‘хсæн ерысты.
БАСКАТЫ Уырызмæг
