Æдзухдæр Мæздæджы район нымад уыд республикæйы хордоныл, æмæ ног хицаудзинады хæс у, цæмæй йын йæ раздæры кад раздахæм, æмæ ныл бынæттон цæрджытæ баууæндой. Цæгат Ирыстоны Сæргълæууæг БИТАРТЫ Вячеслав уый тыххæй дзырдта Мæздæджы районы бюджетмæ æркæсыны рæстæг. Документыл æрныхас кæныныл архайдтой Хицауады Сæрдар ТУСКЪАТЫ Таймураз, РЦИ-Аланийы Финансты министры фыццаг хæдивæг ЗÆГЪОЙТЫ Алан, Финансты министры хæдивæг ХУЫРЫМТЫ Иринæ, муниципалон хицаудзинады минæвæрттæ та уыдысты ГУГИТЫ Геннади, Олег ЯРОВОЙ æмæ Еленæ ТЮНИКОВА.
Битарты Вячеслав фæбæрæг кодта, зæгъгæ, бынæттон аграрон къабазы кусджытæ хæдзардзинæй нæ пайда кæнынц зæххы фæрæзтæй, хуымты раздæры пайдайаг бындур сæфт æрцыд. — Хойраджы мæнæу зайын кæныныл ничи архайы, кæд гæнæнтæ ис, уæддæр. Донхорыг зæххыты фæзуат нæ фылдæр кæны, æмæ ацы хъуыддагыл стæмтæй фæстæмæ зæххæй пайдагæнджытæ архайгæ дæр нæ кæнынц, — загъта районы сæргълæууæг. Республикæйы разамонæг ныхасы архайджыты æргом аздæхта дзидза æмæ æхсыры продукцийы куыстады дæр районы кæй ницы арæзт цæуы, уымæ. — Мæздæджы районы хорз уавæртæ ис раггæнд картоф тауынæн дæр, цæмæй фыццаг тыллæг ист æрцæуа майы æмæ республикæмæ æндæр рæттæй раггæнд картоф ласт ма цæуа. Уымæй уæлдай ничи архайы æхсынæн зайын кæныныл дæр, халва æмæ зети уадзыныл дæр, афтæмæй та уыдон æдзухдæр агурынц фæлхасгæнджытæ. Районы æрмæстдæр иу куырой кæй ис, уый ма дзурæг у, районы хойраджы мæнæу зайын кæныныл кæй ничи архайы, ууыл, — бафиппайдта Цæгат Ирыстоны Сæргълæууæг. Бюджеты статьятыл дзургæйæ, ныхас рацыд уæлбарты ставкæтыл дæр хаццоны фиддонтæ нымайгæйæ, æмæ сæ пайда кæнынц, йæ цæсгом чи суагъта, ахæм зæххæйпайдагæнджытæ. Уый та æркæны бюджеты æфтиагхæссæг хайы сæфтытæм. Республикæйы Сæргълæууæг районы хицауадæн бахæс кодта, цæмæй мадзæлттæ саразой къуырцдзæвæнæй рацæуынæн. — Зæххы хаццоны тыххæй æнæбындурæй дæлдæргонд ставкæйæ фидын — уый у районæн æмæ зæххыл чи кусы, уыцы фæллойгæнджытæн дæр ницы аргъ кæнын, — ахæм уыдис республикæйы разамонæджы хъуыды. Дарддæр уый Тускъаты Таймуразæн бахæс кодта кусæг къорд саразын, цæмæй ногæй бæрæггонд æрцæуа Мæздæджы районы зæххыты кадастрæйы аргъ. Хъуамæ, дам, зæххы иу гектары тыххæй фыст цæуа æппынкъаддæр мин сомы афæдзмæ.
РЦИ-Аланийы Сæргълæууæджы æмæ РЦИ-Аланийы Хицауады пресс-службæ
