Республикæйы медицинон къабаз рæзы

0
520

Ног азы къæсæрыл Цæгат Ирыстоны кусын райдыдта республикон онкологон поликлиникæ. Йæ куысты фыццаг бонты ног медицинон кусæндон бабæрæг кодта республикæйы Сæргълæууæг БИТАРТЫ Вячеслав

Республикæйы æнæниздзинад хъахъхъæнынады министр Михаил Ратманов æмæ республикон онкологон диспансеры æмæ онкологон поликлиникæйы сæйраг дохтыр Бесаты Аслæнбег Битарты Вячеславæн радзырдтой поликлиникæйы куысты фæткы, йæ уавæртæ æмæ йæ гæнæнты тыххæй. Ног медицинон кусæндон æрбынат кодта Дзæуджыхъæуы Маркусы уынджы 71-æм хæдзары. Ацы æртæуæладзыгон бæстыхай арæзт цыд цалдæр азы дæргъы. Медицинон æгъдауæй йæ нысаниуæг цавæр уыдзæн, ууыл дæр ныхас цыд дзæвгар рæстæг. Фæлæ Цæгат Ирыстоны разамынд республикæйы бюджетæй уæлæмхасæн 14 милуан сомы кæй радих кодта, уый фæрцы арæзтад кæронмæ ахæццæ. Онкологон низтимæ баст уавæр республикæйы сагъæссаг кæй у, уымæ гæсгæ та республикон министрады курдиатмæ гæсгæ Уæрæсейы Æнæниздзинад хъахъхъæнынады министрад уынаффæ рахаста, цæмæй ацы ран æрбынат кæна онкологон поликлиникæ. Ног медицинон кусæндон рынчынтæн канд амбулаторон-поликлиникон æххуыс нæ кæндзæн, ацы ран ма сæ дзæбæх кæндзысты боныгон стационары уавæры. Уый тыххæй дзы рынчынтæн ис 50 бынаты. Стационары цыбыр рæстæгмæ чи æрхуысса, ахæм рынчынтæн кæндзысты операцитæ, уыимæ, зындзинæдтæ къаддæр чи æййафын кæны æмæ рынчынтæ æнцондæрæй кæмæн быхсынц, нырыккон ахæм технологитæй пайда кæнгæйæ. Поликлиникæйы фыццæгæм уæладзыджы сты эндоскопийы, гастроскопийы, колоноскопийы, УЗИ æмæ функционалон диагностикæйы кабинеттæ, дыккаджы — рынчынтæ æрмæстдæр боныгон кæм вæййынц, уыцы палатæтæ. Æппæты бынæй, «цокольный» кæй хонынц, уыцы уæладзыджы та æрбынат кодтой нырыккон лабораторитæ. — Онкологон поликлиникæ раздæр кæм уыд, уыцы бæстыхайыл цæуы сæдæ азæй фылдæр, æмæ, кæй зæгъын æй хъæуы, заууатмæ æрцыд. Нырыккон технологиты, нырыккон ифтонггæрзтæ æмæ нырыккон медицинон тыхты фæрцы ног поликлиникæмæ фæзынд рынчынты уавæр ноджы бæстондæрæй, ноджы лæмбынæгдæрæй бæрæг кæныны гæнæнтæ, стæй, бонмæ цы рынчынтæ æрбацæуынц медицинон æххуысмæ, уыдонæн дæр сæ нымæц дзæвгар фæфылдæр. Ног поликлиникæ йæ хъомысмæ гæсгæ медицинон æгъдауæй суткæмæ лæггад кæны 200 рынчынæн. Рынчынæн йæ низ афоныл базонын æмæ йæ ныхмæ дзæбæхгæнæн мадзæлттæ райдайын æмæ сæ низы «дзымбытæй» ратонын — уый у нырыккон медицинæйы сæйраг нысан, — дзырдта Михаил Ратманов. Битарты Вячеслав куыд загъта, афтæмæй, нæ республикæйы Хицауад афæдзы дæргъы æнтыстджын куыст кæй кодта, уый тыххæй Цæгат Ирыстонæн федералон центр радта грант — 85 милуан сомы. «Уыдоныл ма республикон бюджеты хардзæй бафтаудзыстæм 15 милуан сомы, æмæ уыцы 100 милаун сомæй хæстæгдæр бонты поликлиникæйæн балхæндзыстæм, низ йæ райдайæны чи бæрæг кæнынæн æххуыс чи у, ахæм нырыккондæр медицинон техникæ», — загъта Битарыфырт. Стæй ма, медицинон къабазы хæстæгдæр пълантыл ныхас кæнгæйæ, фæбæрæг кодта, ног азы райдайæны кæй байгом уыдзæн æмæ кусын кæй райдайдзæн Сывæллæтты республикон клиникон рынчындоны инфекцион хайады ног бæстыхай, уый фæстæ та афæдзы кæронмæ — тарнизы диспансеры ног бæстыхай.

ДЕДЕГКАТЫ Зæлинæ

ОСТАВЬТЕ ОТВЕТ

Please enter your comment!
Please enter your name here