Ацы бонты дагестайнаг горӕт Каспийскы дарддӕр цӕуынц Европӕйы фыццаг бынат бацахсыныл ерыстӕ грекъаг-ромаг ӕмӕ уӕгъдибар хъӕбысхӕстӕй.
30 апрелӕй 1 маймӕ сбӕрӕг сты уӕлахиздзаутӕ ӕмӕ призон бынӕттӕ бацахсджытӕ грекъаг-ромаг хъӕбысхӕстӕй. Уӕрӕсейы богӕлттӕн бантыст авд хӕрзиуӕджы рамбулын. Уыдонӕй цыппар сты сыгъзӕрин майдантӕ. 63 кг онг уӕзы Уӕрӕсейы командӕйы номӕй хӕцыд Хъӕбӕлоты Зауыр ӕмӕ бацахста ӕртыккаг бынат.
Чемпионаты фӕстаг ӕртӕ боны хӕрзиуджытыл тох кӕнынц уӕгъдибар хъӕбысӕйхӕцджытӕ. Раздӕр куыд хъусын кодтам, афтӕмӕй Уӕрӕсейы иугонд командӕимӕ Каспийскы гауызмӕ рацӕудзысты Цӕболты Хетӕг (74 кг), Найфонты Артур (86 кг) ӕмӕ Байцаты Владислав (97 кг). Уыдонӕй уӕлдай ма Европӕйы цалдӕр бӕстӕйы номӕй сӕ хъару ӕмӕ арӕхстдзинад ӕвдисдзысты ирон уӕгъдибар хъӕбысхӕсты скъолайы аст хъомылгӕнинаджы.
РЦИ-Аланийы Физикон культурӕ ӕмӕ спорты министрады пресс-службӕйы сӕргълӕууӕг Туаты Дианӕ нын куыд фехъусын кодта, афтӕмӕй ӕдӕппӕт Каспийскы уӕгъдибар хъӕбысхӕстӕй нӕ лӕппутӕ хӕцдзысты иуӕндӕсӕй. Цӕболты Хетӕг, Найфонты Артур ӕмӕ Байцаты Владиславӕй уӕлдай гауызмӕ рацӕудзысты: 61 кг — Гарик Барсегян (Сомихы республикӕ), 70 кг — Салхъазанты Таймураз (Словаки), 74 кг — Гулаты ӕхсарбег (Словаки), 86 кг — Махъоты Барис (Словаки), 86 кг — Фриаты Таймураз (Испани), 86 кг — Гоститы Алыксандр (Азербайджан), 97 кг — Рубайты Георги (Молдави) ӕмӕ Четойты Георги (Сомихы республикӕ).
Куыд уынӕм, афтӕмӕй 86 кг онг уӕзы ирыстойнӕгтӕ хӕцдзысты цыппарӕй, 97 кг уӕзы та — ӕртӕйӕ.
Ахӕм уавӕры сӕ алкӕй турнирон хъысмӕт куыд рауайдзӕн, уый зын зӕгъӕн у. Бирӕ аразгӕ уыдзӕн, сӕ хӕлттӕ куыд схаудзысты, уымӕй. Хуыцау зӕгъӕд, ӕмӕ нӕ лӕппутӕ кӕрӕдзиимӕ кӕронбӕттӕны куыд сӕмбӕлой. Иу ныхасӕй, ерыстӕ уыдзысты тынг цымыдисаг ӕмӕ Ирыстоны спортуарзджытӕн нӕ богӕлттӕ сӕ зӕрдӕтӕ куыд барухс кӕной, ахӕм арфӕйаг рауайӕд сӕ балц!
БАСКАТЫ Уырызмӕг
