Ацы аз дæр та Дзæуджыхъæуы Сæрибары фæзы Цытджын Уæлахизы бонимæ баст æфсæддон парад райдыдта райсомы дæс сахатыл. Фæзы цы сæрмагонд æрлæууæн æмæ æрбадæн бынæттæ уыд, уым рагагъоммæ æмбырд кæнын райдыдтой ветерантæ, нæ республикæйы Хицауады æмæ Дзæуджыхъæуы бынæттон хиуынаффæйады администрацийы бæрнон кусджытæ, æхсæнадон æмæ рухсадон организациты минæвæрттæ, нæ горæты æмæ республикæйы цæрджытæ, хуынд адæм.
Парады райдайæны райхъуыстысты зарæг «Священная война»-йы зæлтæ. Цагъта йæ æфсæддон оркестр. Уый зæлтæм рахастой Уæлахизы тырысайы халдих æмæ УФ-йы æфсæддон тыхты тырыса. Уый фæстæ парады раныхас кодта РЦИ-Аланийы сæргълæууæг Битарты Вячеслав.
— Нæ бæстæйы цæрджытæ хъæбатырæй хæцыдысты цыфыддæр знаджы ныхмæ æмæ равдыстой стыр сгуыхтдзинад. Не стыр уæлахизмæ се ‘вæрæн бахастой нæ республикæйы цæрæг адæмыхæттытæ дæр. Мах сæрыстыр стæм, нæ бæстæйы адæмты стыр Уæлахизы кæй ис Ирыстоны цæрджыты лæгдзинад æвдисæг цаутæ æмæ сгуыхтытæ дæр, уымæй. Нæ адæмы æхсæн ис бирæ инæлæрттæ, булкъонтæ, стæй æндæр æфсæддон цинтæ райсæг минæвæрттæ. Советон Цæдисы Хъæбатырты нымæц та хæццæ кæны 79-ы онг. Ацы æппæт бæрæггæнæнтæ æмæ нысантæ дзурæг сты нæ адæмы ныфсхастдзинадыл æмæ лæгдзинадыл. Мæ сæрæй ныллæг кувын нæ уæлахиздзау фæлтæрæн. Уе ‘ппæты дæр бæрæгбоны хорзæх уæд! —загъта Битарты Вячеслав.
УФ-йы Президенты Æххæстбарджын минæвары хæдивæг Хуссайраг федералон зылды Максим Владийæ раныхасы загъта: «Зынаргъ ветерантæ, фронты фæсчъылдымы архайджытæ, хæсты сывæллæттæ, республикæйы цæрджытæ! Бар мын раттут, цæмæй уын УФ-йы Президенты Æххæстбарджын минæвар Хуссайраг федералон зылды Олег Белавенцевы номæй арфæ ракæнон не Стыр Уæлахизы 73 азы боны фæдыл. Уыцы Уæлахизы ахадындзинад кæддæриддæр уыдзæн стыр нæ историйы. Нæ бæстæйы адæмтæ хæсты уæззау азты цы федтой æмæ бавзæрстой, уыдон баззайдзысты нæ бæстæйы нырыккон историйы. Уыдон æххæст уыдысты лæгдзинадæй, удвидардзинадæй, намысæй æмæ уыциу рæстæг цины æмæ масты цæссыгтæй. Абоны æрыгон фæлтæр хъуамæ нæ фыдæлты тохы уæззау фæндæгты сгуыхтытæ зона æмæ архайа нæ адæмы æмæ нæ бæстæйы иумæйаг рухс сомбоныл. Уымæ та нæ разæнгард кæнынц Фыдыбæстæйы Стыр хæсты ветеранты лæгдзинады цаутæ. Уыдон нын сты царды скъола. Æнусон кад æмæ намыс, не ‘хсæн чи нал ис, уыцы тохвæллад хæстонтæн. Ирыстонæн та мæ цæст уарзы амонд æмæ фæрныгад».
Раздæр азты куыд уыд, афтæ та ныр дæр Æфсæддон парады фыццаг ацыдысты музыкантты ротæйы гуымсæгтыл цæгъдджытæ. Уый фæстæ та рæсугъд рæнхъæвæрды рацыдысты Фыдыбæстæйы Стыр хæсты, фæллойы, Гæрзифтонг тыхтæ æмæ барадхъахъхъæнæг оргæнты ветерантæ. Парады архайдта æртæ фæлтæры кадджын караул дæр. Йæ уæнгтæ та уыдысты æфсæддон денджызонтæ, Уæлдæфон-космосон тыхты службæгæнджытæ æмæ фистæгæфсæддонтæ, 58-æм æфсады æфсæддонтæ, суинаг æфсæддонтæ, Национ гвардийы уæнгтæ æмæ суворовонтæ. Парады кадджын колоннæты разæй цыдысты инæлар Къаболаты Солтан æмæ 58-æм æфсады хæстон цæттæдзинады хайады хицау, булкъон Сергей Нартымов. Æфсæддонты æмæ ветеранты фæстæ Сæрибары фæзы фæзынис алыхуызон æфсæддон техникæ: танктæ, æфсæддон машинæтæ æмæ УФ-йы æфсады ногдæр хъахъхъæнæн æфсæддон бастдзинады техникæ. Уый фæстæ Сæрибары фæзæй суанг Сабырдзинады проспекты кæронмæ ацыдысты “Æнæмæлгæ полчъы” архайджытæ. Уыдон та сæ къухты хастой, сæ бинонтæй, хæстæг-хиуæттæй хæсты чи архайдта, уыдоны хуызистытæ. Фаронау та ныр дæр æппæты фылдæрæй рацыдысты Багатæ — 421. Мыггаджы советы сæрдар Васили куыд загъта, афтæмæй уал адæймаджы радтой сæ цард Райгуырæн бæстæйы сæраппонд ацы мыггагæй.
Азæй-азмæ “Æнæмæлгæ пъолчы” архайджыты нымæц кæны фылдæр. Се ‘хсæн вæййы куыд хистæртæ, астæуккаг фæлтæр, афтæ фæсивæд æмæ сывæллæттæ дæр.
Æфсæддон парады фæстæ Уæлахизы бонимæ баст мадзæлттæ дарддæр цыдысты Хетæгкаты Къостайы номыл культурæ æмæ фæлладуадзæн парчы. Ам куыста æфсæддон цæлгæнæн. Парчы ма уыд алыхуызон концерттæ, æфсæддон кинонывты равдыст дæр. Изæры фараст сахатыл та — Уæлахизы бæрæгбоны салют.
ГАСАНТЫ Валери
