Нæ республикæйы алы районы дæр цы бирæ алывæрсыг лыггæнинаг фарстатæ ис, уыдоныл æмзондæй, иумæйаг хъарутæй архайын, — ахæм стыр нысанимæ конд æрцыд РЦИ-Аланийы муниципалон арæзтты Совет. Æрæфы районы бынæттон хиуынаффæйады администрацийы уыд Советы правленийы радон æмбырд. Амыдта йæ Советы сæрдар, Кировы районы сæргълæууæг НÆКУЫСАТЫ Барис.
РЦИ-Аланийы финансты министры фыццаг хæдивæг Зæгъойты Аланæн йæ раныхас уыд, хъæууон цæрæн бынæтты бюджеттæм фылдæр æфтиæгтæ цæуынæн цы гæнæнтæ ис, ууыл.
— Æххуысы хуызы, республикон бюджетæй райсынц 20 проценты, хъалонтæ æмбырдгæнæн оргæнтæн бынæттон администрацитæ хъуамæ æххуыс кæной, закъонмæ гæсгæ цы æмбæлы, уыцы зæххы æмæ æндæр хъалонтæ афойнадыл фидын кæй хъæуы, ууыл дзурой адæмимæ. Ацы куыст хуыздæр кæм цæуа, уыцы районтæн министрады ‘рдыгæй уыдзæн æххуыс, — загъта Зæгъойты Алан.
Районты бюджеттæ куыд кадавар сты æмæ уымæ гæсгæ, сæ авналæнтæ дæр куыд цыбыр сты, ууыл цыд дæргъвæтин ныхас.
Цæмæй адæм сæ цæрæн бынæттæй æндæр рæттæм ма цæуой куыстагур, рæза хъæууон хæдзарады къабаз, уый тыххæй паддзахадон æххуыс хъæуы. Зæххыл кусын кæй фæнды, уыдон къуырцдзæвæнмæ бацæуынц, зæххы кадастрон аргъ рæзы, банктæ кусынц æрмæст стыр куыстуæттимæ, адæм сæ маст, сæ сагъæстимæ цæуынц бынæттон администрацитæм. Ацы фарстайы фæдыл сæ хъуыдытæ загътой Дыгуры районы сæргълæууæг Таболты Алыксандр, Æрæфы районы администрацийы сæргълæууæг Хамыхъоты Барис, Дзæуджыхъæуы муниципалон арæзты сæргълæууæджы фыццаг хæдивæг Зæнджиаты Чермен æмæ иннæтæ. Æрыдоны районы сæргълæууæг Тотраты Владислав фæндон бахаста, ацы ахсджиаг фарстайыл Советы хицæн æмбырды ноджы бæстондæрæй æрныхас кæнын. РЦИ-Аланийы Мидхъуыддæгты министрады пъæлицæйы хицауы хæдивæг Альберт Сабанаев фæсидт районы хицæуттæм, цæмæй Цæгат Ирыстоны, уыимæ æппæт районты дæр сног кæной адæмон дружинæты архайд.
— Ныртæккæ нæм кусы 33 дружинæйы, сæ рæнхъыты ис 790 адæймаджы, — загъта министрады минæвар æмæ районты ацы фарстайыл куыд кусынц, уый фæнысан кодта. — Æмгуыстад кæнын хъæуы хъазахъхъæгты æхсæнадтимæ, дружинæты уæнгты сифтонг кæнын хъæуы æмбæлгæ атрибутикæйæ.
РЦИ-Аланийы наркотикты ныхмæ тохгæнæг къамисы аппараты разамонæг Луизæ Лебедевайы ныхас уыд, хъæддаг гæн кæм зайы уыцы бынæттæ бæлвырд кæнын æмæ йемæ тох кæныны тыххæй. Алы районы дæр арæзт ис кусæг къордтæ, уыдон сбæлвырд кодтой 210 ахæм бынаты, республикæйы хардзæй 100 мин сомæй балхæдтой гер- бицид. Æрвылаз тох цæуы, фæлæ ацы зианхæссæг зайæгой бындзарæй сыскъуынын тынг зын у.
Зынгсирвæзтæй нæ хъæдтæ æмæ быдыртæ бахъахъхъæныны, æрдзон фыдбылызтæ ма ‘руадзыны тыххæй дзырдта Æнæнхъæлæджы уавæрты министрады управленийы сæйраг специалист Хъæрæцаты Георги.
РЦИ-Аланийы фæсивæды хъуыддæгты комитеты цур кусы «Центр социализации молодежи» зæгъгæ, ахæм паддзахадон бюджетон куыстуат.
— Йæ архайд цæмæй æнтыстджын уа, уый тыххæй æмгуыстадмæ æнхъæлмæ кæсынц районты админтрацитæм æмæ Дзæуджыхъæуы горæты разамындмæ, — загъта нæ республикæйы фæсивæды хъуыддæгты комитеты сæрдар Джусойты Руслан.
Кæронбæттæны Советы правленийы сæрдар Нæкуысаты Барис фехъусын кодта, июны мæй Дзæуджыхъæуы кæй цæудзæн Уæрæсейы Хуссайраг регионты муниципалон арæзтты ‘хсæн æмгуыстады тыххæй координацион советы иумæйаг æмбырд.
ЦÆГÆРАТЫ Жаннæ
