Цӕгат Ирыстоны паддзахадон университет сси Химионфармацевтон науконахуырадон медицинон кусӕндӕтты иугонды уӕнг. Ацы иугонды ЦИПУ у иунӕг классикон уӕлдӕр ахуыргӕнӕндон.
Ӕдӕппӕт 12 уӕлдӕр ахуыргӕнӕндоны кӕдӕм бацыдысты, уыцы иугонды координатор у Петербурджы паддзахадон химион-фармацевтон академи. Амынд ахуыргӕнӕндӕтты ректортӕ Игорь Наркевич ӕмӕ Огъуаты Алан сӕ къухтӕ ӕрӕвӕрдтой ахуырадон, наукон ӕмӕ техникон авналӕнтӕ баиу кӕныны тыххӕй бадзырды.
— Нӕ иумӕйаг куысты фӕрцы ис наукон фӕлтӕрддзинад ӕмӕ техникон авналӕнтӕй нырӕй ахадгӕдӕр уагӕй пайда кӕныны фадат. Иугонды уӕнгтӕ ӕмхуызон бартимӕ лыггӕнинаг фарстатыл кусдзысты. Зайӕгойтӕй пайда кӕнгӕйӕ, нӕ университет дзӕбӕхгӕнӕн косметикӕйы къабазы иртасӕн куыст ӕххӕст кӕны, — загъта ЦИПУ-йы ректор Огъуаты Алан.
Медицинон иугӕндтӕ аразынц бӕстӕйы ӕнӕниздзинад хъахъхъӕнынады министрады фӕндонӕй. Проекты хӕс у иугонды архайджыты гӕнӕнтӕй ахадгӕйӕ пайда кӕнын ӕмӕ специалистты цӕттӕкӕнынады къӕпхӕн фӕуӕлдӕр кӕнын.
Нӕ уацхӕссӕг
