Цæгат Ирыстоны Мыхуыр æмæ дзыллон коммуникациты хъуыддæгты комитеты сæрдар ФИДАРАТЫ Юри республикæйы паддзахадон унитарон куыстуат «Издательство «Ир»-ы коллективы базонгæ кодта сæ ног директор ТАУТИАТЫ Хъазыбегимæ.
2001 азæй нырмæ рауагъдады сæргъы лæууыд Кодзырты Жаннæ.
— Директоры баивтам рауагъдады дарддæры рæзты пълантимæ баст экономикон æууæлтæм гæсгæ. Кодзырты Жаннæ Цæгат Ирыстоны чиныгуадзæн къабазы рæзтмæ бахаста стыр æвæрæн, фæлæ нырыккон финансон-экономикон уавæр домы куыстуаты разамындмæ ногдзинад бахæссын, — коллективы раз ныхас кæнгæйæ, загъта Фидары-фырт.
Комитеты сæрдар рауагъдады кусджыты фæрстытæн дзуапп радта. Кусджыты цымыдис кодта кусæндон æхцайæ ифтонг кæныны фæтк. Уымæй уæлдай ныхас цыд ирон чиныджы дукани саразыны хъуыддагыл дæр. — Рауагъдады хæрдзтæ йе ‘фтиæгтæй фылдæр цæмæй ма уой, Таутийы-фырты хæс у ууыл бацархайын, — загъта Фидараты Юри.
2004 аз Таутиаты Хъазыбег каст фæци Цæгат Ирыстоны Хетæгкаты Къостайы номыл паддзахадон университеты историон факультет. У дæс чиныгæй фылдæры автор, Хъазыбегмæ ис дзыллон хабархæссæг фæрæзты къабазы куысты стыр фæлтæрддзинад. Таутийы-фырты хъæппæрисæй ногæй цæуын райдыдта Цæгат Ирыстоны æмæ Уæрæсейы хуссары рагондæр газет «Терские ведомости». Ныры онг Хъазыбег уыд ацы газеты сæйраг редактор.
