Ацы аз бæстæйы Пенсион фонды цæгатрыстойнаг управленимæ адæмæй æрбафтыд пенси сын сæвæрыны æмæ йæ адæймагмæ хæццæ кæныны хуыз равзарыны тыххæй 8,7 мин курдиаты. Ацы курдиæттæй 6,8 мины æрбарвыстæуыд æнæконтактон уагæй — Пенсион фонды сайт www.pfrf.ruйы «Личный кабинет гражданина»-йы фæрцы
Пенсион фонды лæггæдтæй пайда кæнгæйæ, адæм сæ пенсион хъуыддаг рагацау кæй саразынц, уымæ гæсгæ сыл пенси сæвæрыны тыххæй курдиат барвитыны рæстæг ведомствойы клиентон службæмæ æнæмæнг цæуыны хæс æвæрд нæ вæййы. Пенси афоныл сæвæрынæн уæлæмхасæн гæххæттытæ специалистты кæд бахъæуой, уæд бацамонæн ис курдиат барвитæджы телефоны номыр, науæд та — йæ электронон посты адрис.
Адæм пенси сæвæрыны фæдыл амынд электронон лæггадæй парахатæй пайда кæнынц. Бæстæйы Пенсион фонд кæй фиды, уыцы фонды сайты «Личный кабинет гражданина»-йы фæрцы ис пенсийы æппæт уыцы хуызтæ сæвæрыны фадат. «Личный кабинет гражданина»- йы фæрцы пенси сæвæрынæн баххæст кæнын хъæуы къорд æууæлы: курдиат барвитæджы къорд бæрæггæнæны бавдисут, стæй пенсийы хуыз æмæ йæ адæймагмæ хæццæ кæныны хуыз равзарут. Пенси афоныл сæвæрынæн уæлæмхасæн бæрæггæнæнтæ Пенсион фонды специалистты кæд бахъæуой, уæд ис телефоны номыр æмæ электронон посты асыкк бацамоныны фадат.
Пенсион фонд куыстдæтджытæй кæй райста, пенсийы бæрц нымайынц уыцы бæрæггæнæнтæм — фæллойадон архайды замантæм куысты бынæттæ æмæ нымад фæдзæстадон фиддонты бæрцмæ — гæсгæ. Æппæт ацы бæрæггæнæнтæ фыст сты «Личный кабинет гражданина»-йы хайад «О сформированных пенсионных правах»-ы. Цавæрдæр бæрæггæнæнтæ æххæстæй нæ банымадтой, зæгъгæ, фидæны пенсиисæг кæд афтæ æнхъæл у, уæд бæрæггæнæнтæ сбæлвырд кæнынæн æмæ сæ Пенсион фондмæ барвитынæн куыстдæттæгмæ æмбæлы рагацау бахатын.
Уæ зæрдыл уын лæууын кæнæм: Пенсион фонды лæггæдтæй электронон уагæй спайда кæнынæн адæймаджы хæс у паддзахадон лæггæдты порталы йæхи регистраци скæнын. Афтæ бакæнæн ис хæдбарæй, науæд та цæрæнуаты бынатмæ гæсгæ Пенсион фонды цæгатирыстойнаг хайады клиентон службæйы (адæймаг йæхимæ хъуамæ дара паспорт, СНИЛС æмæ мобилон телефон-электронон пост).
Паддзахадон лæггæдты хæрзхъæддзинад фæхуыздæр кæнынæн Пенсион фонд иудадзыг уæрæх кæны электронон кабинеты гæнæнтæ, æмæ афтæмæй ацы кабинет ныртæккæ пенситæй фæстæмæ æххæссы Пенсион фонды æндæр фиддонтыл — æрвылмæйон фиддонтыл, социалон лæггæдтыл, ныййарæджы капитал æмæ æндæртыл дæр.
Пенсион фонд электронон уагæй кæй кæны, æппæт уыцы лæггæдтæ фыст сты https:||es.pfrf.ru адрисмæ гæсгæ Пенсион фонды сайты иумæйаг порталы. Ныртæккæ цæгатирыстойнæгтæн ис пенсион æмæ социалон ифтонгады фæдыл 30 лæггадæй фылдæрæй пайда кæныны фадат.
