Зындгонд куыд у, афтæмæй РЦИ-Аланийы Промышленность æмæ транспорты министрад рæстæгæйрæстæгмæ аразы бæлццæттæласæн транспорты куысты фæтк бæрæг кæныны рейдтæ. Радон ахæм цæстдарæн мадзал арæзт æрцыд цалдæр боны размæ æмæ йæ нысан уыд сбæрæг кæнын, Дзæуджыхъæуы муниципалон маршруттыл транспорт изæрыгæтты куыд кусы, уый.
Уый тыххæй фехъусын кодта министрады прессслужбæ.
Куыд иннæ хæттыты, афтæ ныр дæр Промышленность æмæ транспорты министрады специалисттæй уæлдай рейды архайдтой «Ространснадзор»-ы республикон управленийы минæвæрттæ дæр. Рейды архайджытæ 20 сахатæй 22 сахаты онг рад хастой, Штыбы фæзы, Паддзахадон агроуниверситеты, Тагъд æххуысы клиникон рынчындоны, «ОЗАТЭ» æмæ æндæр организациты раз цы æрлæууæн бынæттæ ис, уым.
Рейд ахаста 4 боны æмæ равдыста ахæм бæрæггæнæнтæ: 20 сахатæй фæстæмæ 11-æм, 15-æм, 31-æм, 41 æмæ 44-æм маршруттыл транспорт бынтондæр нал уыд; 3-æм, 4-æм, 19-æм, 21-æм, 23- æм, 26-æм, 27-æм, 33- æм, 35-æм, 37-æм, 40 æмæ 50-æм маршруттыл транспорт цыд къуылымпытимæ; 1-æм, 5-æм, 7- æм, 13-æм, 17-æм, 18- æм, 22-æм, 24-æм, 25 æмæ 77-æм маршруттыл транспорт цыд графикмæ гæсгæ.
Рейды бæрæггæнæнтæй хатдзæгтæ кæнгæйæ, республикæйы промышленность æмæ транспорты министр Хайдарбек Бутов куыд фæнысан кодта, афтæмæй æппæт æгъдаухæлдтыты фæдыл æрмæджытæ дæр æрвыст æрцæудзысты тæрхондонмæ, цæмæй æбæрнон транспортон компанитæ административон æгъдауæй æфхæрд баййафой. Нæ уацхæссæг
