Равзæрст дæсныйæдтæм фыццаг къахдзæфтæ — иттæг хорз бæрæггæнæнтыл

0
251

 

Цæгат Ирыстоны паддзахадон университеты концертон залы знон уыд стыр бæрæгбон — йæ рауагъдонтæ, университет иттæг хорз бæрæггæнæнтимæ каст чи фæци, уыцы хуыздæр студенттæ республикæйы бæрнон адæймæгты къухтæй райсой Сырх дипломтæ æмæ майдантæ.

Университеты хуыздæр рауагъдонтæн ахæм кадджын бон арфæ ракæнынмæ æмæ сæ бæрæгбоныл иумæ бацин кæнынмæ æрбацыдысты республикæйы Парламенты Сæрдар Алексей Мачнев, Хицауады Сæрдар Тускъаты Таймураз, горæт Дзæуджыхъæуы муниципалон арæзты сæргълæууæг Хæдарцаты Махарбег. «Фондз азы дæргъы университеты ахуыр кæнгæйæ, сымах равдыстат, ныфсхаст æмæ куыстуарзаг кæй стут, уыцы хорз миниуджытæ. Ныр уæ равзæрст дæсныйæдты кæндзыстут фыццаг фæллойадон къахдзæфтæ, æмæ кæмфæнды куы кусат, уæддæр уын мæ зæрдæ зæгъы, дæсны специалисттæ уæ куыд рауайа, сæйрагдæр та — нæ Райгуырæн бæстæйы æцæг патриоттæ æмæ граждантæ уæ рауайæд», — загъта Алексей Мачнев. Тускъаты Таймураз та, хуыздæр студенттæн арфæ кæнгæйæ, загъта: «Уæ бон бирæ кæй у, ууыл уæхи дæр, не ‘ппæты дæр баууæндын кодтат уæ иттæг хорз ахуырæй. Райсом райдайдзæн уæ царды ног æмæ, уырны мæ, æнтыстджын къæпхæн. Уæ дæсныйады стыр бæрзæндтæм схизут, сæйрагдæр та — амондæй хайджын ут царды».

Уый фæстæ Алексей Мачнев, Тускъаты Таймураз, Хæдарцаты Махарбег, республикæйы Арбитражон тæрхондоны сæрдар Джиоты Зелим, Цæгат Ирыстоны паддзахадон университеты президент Мæхæмæтты Ахуырбег, ректор Огъуаты Алан университеты хуыздæр рауагъдонтæн радтой Сырх дипломтæ æмæ зæрдылдарæн майдантæ. Уыцы хуыздæрты ‘хсæн уыдысты: экономикон факультеты 36 рауагъдоны; химийы, биологи æмæ биотехнологийы факультеты 13 рауагъдоны; географи æмæ геоэкологийы 13 рауагъдоны; физико-техникон факультеты 5 рауагъдоны; математикæ æмæ информацион технологиты факультеты 7 рауагъдоны; юридикон факультеты 43 рауагъдоны; уырыссаг филологийы факультеты 12 рауагъдоны; фæсарæйнаг æвзæгты факультеты 8 рауагъдоны; ирон филологийы факультеты 8 рауагъдоны; журналистикæйы факультеты 6 рауагъдоны; аивæдты факультеты 8 рауагъдоны; стоматологи æмæ фармацийы факультеты 5 рауагъдоны; дунеон ахастдзинæдты факультеты 15 рауагъдоны; разамынды факультеты 16 рауагъдоны æмæ физикон культурæ æмæ спорты факультеты 1 рауагъдон. Мæхæмæтты Ахуырбег рауагъдонтæй уæлдай арфæ ракодта, студенттæ æнтыстджынæй сæ ахуыр цæмæй фæуой, уым йæхи бавæрæн чи бахаста, университеты уыцы ахуыргæнджытæн, факультетты декантæн æмæ кафедрæты сæргълæуджытæн. Огъуаты Алан та арфæ ракодта студентты ныййарджытæн, сæрыстыры хос чи у, ахæм хорз кæстæртæ чи схаста, уыдонæн.

Рауагъдонтæн Сырх дипломтæ æмæ майдантæ чи лæвæрдта, уыдон се ‘ппæт семæ систой зæрдылдарæн къамтæ. Аивæдты факультеты студенттæ та равдыстой цымыдисаг концерт.

ДЕДЕГКАТЫ Зæлинæ

ОСТАВЬТЕ ОТВЕТ

Please enter your comment!
Please enter your name here