Национ гвардийы федералон службæйы æфсæдты Республикæ Цæгат Ирыстон-Аланийы управленийы дæлхайæдты кусджытæ бæрнон хæстæ æххæст кодтой дунейы футболон чемпионаты рæстæг. Уыцы фарстайыл ныхасæй райдыдта сæ кусæг фембæлд РЦИ-Аланийы Сæргълæууæг БИТАРТЫ Вячеслав æмæ Национ гвардийы федералон службæйы æфсæдты директоры хæдивæг, инæлар-булкъон Сергей МЕЛИКОВÆН.
Уый тыххæй фехъусын кодта Цæгат Ирыстоны Сæргълæууæджы æмæ Цæгат Ирыстоны Хицауады пресс-службæ.
Ацы бонты Сергей Меликов æмæ Национ гвардийы федералон службæйы æфсæдты иннæ бæрнон кусджытæ балцы уыдысты Цæгат Ирыстоны. Бынаты сын цалдæр ахсджиаг фембæлды уыд республикæйы Хицауады минæвæрттимæ. Фысымтæ æмæ уазджытæ радон хатт бæстон æрдзырдтой æмархайды фарстатыл.
Сергей Меликов республикæйы Сæргълæууæгæн куыд радзырдта, афтæмæй футболон чемпионаты рæстæг цæгатирыстойнаг гвардионтæ зæрдиагæй архайдтой æхсæнадон фæтк хъахъхъæныны хъуыддагыл. Уыцы бонты не ‘мзæххонтæ уыдысты горæттæ Ростов æмæ Волгограды, бæрнонæй æххæст кодтой сæ службæйы хæстæ. Ирыстойнаг гвардионтæ ныр сыздæхтысты сæ хæдзæрттæм, уыимæ, йæхи арæхстджындæрæй æмæ дæсныдæрæй чи равдыста, уыцы службæгæнджытæ хорзæхджынгонд æрцæудзысты ведомствойон хæрзиуджытæй.
«Уе ‘мзæххонтæ равдыстой бæрзонд профессионалон дæсныдзинад æмæ сын уый тыххæй æз бузныг зæгъын», — загъта Сергей Меликов.
Цæгат Ирыстоны территорийыл барадон фæткы уавæрыл дзургæйæ, Сергей Меликов куыд фæнысан кодта, афтæмæй республикæйы бæстон хъахъхъæд цæуы адæмы æдасдзинад. «Уыимæ, Ирыстонмæ куы ссæуын, уæд уайтагъддæр æхсызгонæй бафиппайын, республикæйы хуыздæрæрдæм цы ивддзинæдтæ цæуы, уыдон. Уыцы хъуыддаджы, кæй зæгъын æй хъæуы, ис де стыр бавæрæн», — Битарты Вячеславмæ дзургæйæ, бафиппайдта Национ гвардийы æфсæдты федералон службæйы директоры хæдивæг.
Уымæй уæлдай, Сергей Меликов республикæйы разамонæгæн бузныг загъта, фæстаг рæстæг регионы цы ахсджиаг æфсæддонпатриотон мадзæлттæ арæзт æрцыд, уый тыххæй. Уыдоны нымæцы: УФ-йы Мидхъуыддæгты министрады Цæгат Кавказы æфсæддон университеты 80 азы бæрæгбон æмæ мемориалон комплекс «Барбашовы фæз»-ы арæзтад.
Нæ уацхæссæг
