Дзæуджыхъæуæй Джызæлы æхсæн бæлццæттæласæн транспорт цæуыны фæтк æххæст кæны, æви нæ, Цæгат Ирыстоны Промышленность æмæ транспорты министрады кусджытæ адæмы курдиатмæ гæсгæ уый рабæрæг кодтой.
Амынд маршрутыл бæлццæтты ласынц ГУАТП «Октябрьское»-мæ хауæг 32 микроавтобусы. Транспортон фæрæзтæ маршрутыл цæуыны фæтк куыд æххæст кæнынц, уый райсомы 7 сахатæй 9 сахаты онг бæлвырд кодтой Джызæлы. Куыд рабæрæг, афтæмæй маршрутыл цæуы фаг транспортон фæрæзтæ, цæуыны фæтк æххæст кæнынц, бæлццæттæ лæууæн бынæтты нæ баззайынц. Маршруткæтæ кæройнаг лæууæн бынатæй рацыдысты 7 сахаты æмæ 3 минутыл, 7 сахаты æмæ 18 минутыл, 7 сахаты æмæ 23 минутыл, 7 сахаты æмæ 35 минутыл, 7 сахаты æмæ 46 минутыл, 7 сахаты æмæ 50 минутыл, 8 сахаты æмæ 2 минутыл, 8 сахаты æмæ 12 минутыл, 8 сахаты æмæ 25 минутыл, 8 сахаты æмæ 37 минутыл, 8 сахаты æмæ 43 минутыл, стæй 8 сахаты æмæ 50 минутыл.
— Ныртæккæ бæлццæтты иу хайæн — скъоладзаутæ æмæ студенттæн — сæрдыгон каникултæ кæй ис, уый нымайгæйæ, сфæнд кодтам ацы азы сентябры ноджыдæр ма иу хатт мониторинг баххæст кæнын. Бахъуаджы рæстæг транспорты цæуыны фæткмæ ивддзинæдтæ бахæсдзыстæм, — загъта министрады сæргълæууæг Хайдарбек Бутов.
