Номдзыд ирон ахуыргонд, фыссæг, поэт, Хетæгкаты Къостайы номыл паддзахадон премийы лауреат, Фыдыбæстæйы Стыр хæсты архайæг, йæ адæмы иузæрдион хъæбул Джусойты Нафийы ном, курдиат, йе сфæлдыстад зындгонд æмæ уарзон сты Ирыстоны æмæ Цæгат Кавказы цæрæг адæмтæн. 2015 азы ахуыргонды 90 азы юбилеймæ Хуссар Ирыстоны нысангонд æрцыд Джусойты Нафийы номыл литературон преми. Уæдæй абонмæ преми амалхъомты компани «Амонд»-ы хъæппæрисæй (компанийы минæвар ХУЫГАТЫ Ростислав æмæ йæ директор ЧЕЛÆХСАТЫ Хъазыбег) лæвæрд цæуы литературæйы къабазы дзырдаивады жанрты — поэзийы, прозæйы хуыздæр уацмысты автортæн.
Æрæджы нæ редакцийы уазæг уыд фонды директор Челæхсаты Хъазыбег æмæ радзырдта, ацы аз преми райсыныл конкурсы къамисмæ дзырдаивады уацмыстæ цы уагæвæрдмæ гæсгæ ист цæудзысты, уый тыххæй
— Премийы бындурæвæрджытæн æмæ расидджытæн сæ сæйраг нысан у, ирон æвзагыл аивадон уацмыстæ чи фыссы, уыдонæн сæ курдиатджындæрты сбæрæг кæнын æмæ сæ премийы фæрцы сфæлдыстадон куыстмæ ноджы тынгдæр сразæнгард кæнын, — загъта Хъазыбег, — Нафийы номыл преми райсынмæ кандидаты хъуамæ къамисмæ бавдисой сфæлдыстадон цæдистæ, зонадон организацитæ.
— Хъазыбег, преми райсыныл конкурсы архайынмæ къамисмæ цавæр хъуыддаджы гæххæттытæ хъуамæ лæвæрд æрцæуа?
— Преми райсыныл конкурсы чи архайа, уыцы адæймæгты цы организацитæ бавдисой, уыдон хъуамæ бацæттæ кæной кандидаты цыбыр сфæлдыстадон биографи; фæстаг азты цы уацмыстæ сфæлдыста, уыдоны нæмттæ, кæд æмæ кæм æрцыдысты мыхуыргонд, стæй сын мыхуыры æмæ дзыллон хабархæссæг фæрæзты цавæр аргъгонд æрцыдис, уый тыххæй литературон-критикон информациимæ.
— Преми райсынмæ цавæр литературон жанрты фыст уацмыстæ ист цæуынц?
— Автор, фыссæг, кæнæ поэт цы романтæ, пьесæтæ, æмдзæвгæтæ ныффыста, уыдоны чингуытæ. Премимæ æвдисæг организаци йæ фыстæгимæ хъуамæ бавдиса ноджы сфæлдыстадон цæдисы, зонадон организацийы уынаффæйы суагъæйы халдих. Фыстæгимæ ма хъуамæ уа фыссæджы уацмысы мыхуыргонд оригинал. Къамисмæ æвдыст цæуынц иу авторы уацмыстæ. Коллективон сфæлдыстадон куыстытæм каст нæ цæудзæн. Премимæ бавдисæн ис æрмæст удæгас фыссæджы, поэты сфæлдыстадон куыстытæ.
— Цал уыдзысты премитæ, стæй се ‘хцайы бæрц цас у?
— Премитæ сты æртæ: фыццаг преми — 150 мин сомы; дыккаг — 100 мин сомы; æртыккаг — 50 мин сомы. Конкурсы чи фæуæлахиз уа, уыдонæн лæвæрд цæудзæн премиимæ лауреаты диплом æмæ майдан Джусойты Нафийы фæлгонцимæ
— Преми райсыныл конкурсмæ йе сфæлдыстадон куыстытæ чи бадæтта, уыцы авторты уацмыстæн чи аргъ кæндзæн?
— Конкурсы жюрийы сты Цæгат æмæ Хуссар Ирыстоны фысджытæ, журналисттæ, зонадон интеллигенцийы минæвæрттæ, хæрзаудæн фонд «Амонд»-ы уæнгтæ. Уæлахиздзаутæ бæрæггонд цæуынц сусæг хъæлæскæнынады фæрцы.
— Премийы ацы азы лауреаты нæмттæ хъуамæ кæд сбæрæг уой?
— Преми лæвæрд цæудзæн 2018 азы сентябры кæрон. Кадджын æмбырды лауреаттæй æмæ номинанттæй уæлдай архайдзысты Цæгат æмæ Хуссар Ирыстоны хицауады, сфæлдыстадон æмæ зонадон интеллигенцийы минæвæрттæ. Зындгонд куыд у, афтæмæй фонд «Амонд» Хуссар Ирыстоны ирон æвзаг æмæ литературæйы хуыздæр ахуыргæнджытæн, ХИПУ-йы ирон филологийы факультеты студенттæн снысан кодта номдзыд поэт, тæлмацгæнæг Плиты Грисы номыл стипендитæ дæр. Къамисы уæнгтæ хуыздæртыл цы ахуыргæнджыты æмæ студентты банымайой, уыдон дæр сбæрæг уыдзысты ацы аз сентябры кæрон. Грисы премийæ 50 мин сомы бæрц преми лæвæрд æрцæудзæн ирон æвзаг æмæ литературæйы хуыздæр ахуыргæнæгæн, стæй ХИПУ-йы хуыздæр дыууæ студентæн та саккаг кæндзысты фæйнæ 25 мин сомы.
— Бузныг, Хъазыбег!
ГАСАНТЫ Валери
Джусойты Нафийы номыл преми райсыны конкурсмæ уацмыстæ бавдисæн ис 2018 азы 12 сентябрьмæ ахæм адрисыл: Цхинвал, Исахъы уынг, 47-æм хæдзар, 2-аг уæладзыг, Хæрзаудæн фонд «Амонд». Тел.: 8-929-805-30-94.
