Фæндаг зынгæ фæуæрæхдæр уыдзæн
Ацы бонты Цæгат Кавказы автомобилон фæндæгты управленийы дæлхайæдтæ бавнæлдтой контролон-уадзæн пункт «Уæллаг Ларс»- мæ бацæуæнты рацарæзтмæ. Уый тыххæй фехъусын кодта управленийы пресс-службæ.
Пресс-службæйы минæвары ныхасмæ гæсгæ, Дзæуджыхъæуæй Дæллаг Ларсмæ цæуæг фæндаг æрмæст цалцæггонд не ‘рцæудзæн, фæлæ йæ контролон — уадзæн пунктмæ бахизæны зынгæ фæуæрæхдæр кæндзысты. Уыцы æууæл, кæй зæгъын æй хъæуы, хуыздæрæрдæм фæзындзæн «Уæллаг Ларс»-ы куыстыл, контролон — уадзæн пунктмæ бацæуæнты транспортон фæрæзты хицæуттæн уыдзæн æнцондæр архайæн, къаддæр рæстæг хардз кæндзысты паддзахадон арæны сæрты ахизæныл. Специалисттæ куыд зæгъынц, афтæмæй фæндаджы рацарæзты фæстæ контролон-уадзæн пункты хъомыс фæфылдæр уыдзæн 1,5 хатты æмæ йыл иу суткæмæ хиздзæн 12 мин хæдтулгæйæ фылдæр.
Фæндаджы рацарæзтæй уæлдай, аразджытæ базилдзысты алфамбылай бынæттæм дæр — доны былгæрæттæ фæфидардæр кæндзысты, раивдзысты рухсы телыхъæдтæ æмæ афтæ дарддæр.
Пъланмæ гæсгæ арæзтадон куыстытæ хъуамæ ахицæн уой ацы азы кæронмæ.
Нæ уацхæссæг
