Бæстон практикон зонындзинæдтæ — дæсныйады фидар бындур

0
281

 

Цæгат Ирыстоны паддзахадон медицинон академийы знон йæ куыст кодта студентты æрвылазон наукон-практикон конференци.

Алкæддæр ахуыры азы кæрон медицинон академийы 1-5-æм курсыты студенттæн мæй — мæй æмæ æрдæджы бæрц вæййы практикæ республикæйы стырдæр медицинон кусæндæтты — Цæгат Ирыстоны паддзахадон медицинон академийы клиникæйы, Республикон клиникон рынчындоны, Сывæллæтты республикон клиникон рынчындоны æмæ Тагъд æххуысы клиникон рынчындоны. Стæй канд нæхи республикæйы рынчындæтты нæ, фæлæ нæм ахуыр кæнынмæ цы бирæ студенттæ æрбацæуы алы рæттæй, стæй практикæ кæнынмæ кæдæм ацæуынц, уыцы регионтæ æмæ бæстæты медицинон кусæндæтты — Цæгат Кавказы, Хуссар Ирыстоны, хæстæгдæр æмæ дард фæсарæнты медицинон кусæндæтты.

Практикæйы рæстæг цы фæлтæрддзинад райсынц, уый фæдыл студенттæ сæхи фæндонмæ гæсгæ сæ наукон разамонджыты æххуысæй бацæттæ кæнынц алыхуызон медицинон къабæзты фæдыл наукон куыстытæ, стæй сæ конференцийы рæстæг бавдисынц.

Медицинон академийы Практикон æгъдауæй цæттæгæн центры разамонæг Моргуаты Фатимæ нын куыд радзырдта, афтæмæй ацы аз дзæбæхгæнæн æмæ педиатрон факультетты хистæр курсыты студенттæ — æдæппæт 80 адæймаджы — бацæттæ кодтой сæ наукон куыстытæ. Уыдонæй медакадемийы Студентты наукон совет равзæрста 12 хуыздæр куысты (бацæттæ сæ кодтой студенттæ куыд хицæнæй, афтæ къордгай дæр) æмæ сæ ныр конференцийы рæстæг бавдыстой.

Конференцийы архайджытæн арфæ ракодта академийы ректор Олег Ремизов. Куыд загъта, афтæмæй нырыккон медицинæ тырны рагацау, фыццæгæм курсытæй фæстæмæ, фидæны дохтыртæн практикон бындуртæ æвæрынмæ. Йæ ныхасмæ гæсгæ, ахуыргæнджытæн, наукон кусджытæн абон сæ хæс у, канд теоретикон æгъдауæй фидар чи у, ахæм дохтыртæ нæ, фæлæ, сæйрагдæр, практикон æгъдауæй йæ куыстмæ дæсны чи уа, ахæм специалисттæ цæттæ кæнын, цæмæй æрыгон дохтыр, ахуыр куыддæр фæуа, афтæ ныфсджынæй, йæ хъарутæ æмæ йæ зонындзинæдттыл æууæндгæйæ, райдайа йæ куыст. «Ныртæккæ медицинæ йе ‘ргом тынгдæр аздæхта рынчынмæ. Дохтыр æмæ рынчыны ‘хсæн æууæнкджын, æнгом ахастдзинæдтæ куы уа, уæд уый дохтырæн у тынг ахсджиаг. Дзыхыдзырд, ныхас — уыдонæн мах куысты аргъ нæй. Дзырд адæймаджы маргæ куыд кæны, афтæ йæ дзæбæх дæр кæны, уый уæ рох макуы уæд. Дохтырæн йæ рынчынты нымæц дзурæг у йæ дæсныдзинадыл. Рынчынтæ дохтырмæ куы цæуой, уæд уый дзурæг уыдзæн, кæй йыл æууæндынц, сæ зæрдæ йыл кæй дарынц, ууыл, кæд нæ, уæд та ахæм дохтырæй дохтыр нæй», — дзырдта Олег Ремизов.

Цæгат Ирыстоны паддзахадон медицинон академи фидæны дæсны дохтыртæ кæй цæттæ кæны, ууыл дзурæг у, наукон-практикон конференцийы архайджытæн сæ нымæц алы аз дæр бирæ кæй вæййы æмæ медицинæйы ахсджиагдæр къабæзтыл уыдон бындурон æмæ цымыдисаг наукон куыстытæ кæй бацæттæ кæнынц, уый. Ацы аз конференцийы архайджыты бацæттæ кодтой: педиатрийы къабазы — доцент Хъариаты Светланæ, акушерон къабазы — доцент Чехойты Анжелæ, хирургийы къабазы — профессор Милдзыхты Георги æмæ конференцийы оргкомитеты уæнгтæ — медицинон академийы инновацитæ æмæ наукæйы фæдыл проректоры хæдивæг Аллæ Гурина, стæй Студентты наукон æхсæнады сæрдар, дзæбæхгæнæн факультеты 5-æм курсы студент Хъуылымбегты Георги.

Æппæт куыстытæм дæр байхъусыны фæстæ конференцийы архайджытæм рауад цымыдисаг ныхас. Кæронбæттæны хуыздæртæн оргкомитет радта зæрдылдарæн лæвæрттæ. Уымæй уæлдай, алы хатт куыд вæййы, афтæ ацы аз дæр конференцийы архаджытæн аивадон лæвар ракодта медицинон академийы кæфтыты ансамль «Цин», йæ разамонæг РЦИ-Аланийы сгуыхт артисткæ Хуыбиаты Зæринæ.

ДЕДЕГКАТЫ Зæлинæ Къамтæ систа КЪÆБЫСТЫ Харитон

ОСТАВЬТЕ ОТВЕТ

Please enter your comment!
Please enter your name here