Президенты Указтæй…
Хуссар Ирыстоны Президент БИБЫЛТЫ Анатоли цы Указ бафыста, уымæй ТЕДЕТЫ Вадим нысангонд æрцыд Хуссар Ирыстоны ТЫБЫЛТЫ Алыксандры номыл университеты ректорæй
Уый тыххæй знон фехъусын кодта республикæйы Президенты пресс-службæ.
Афтæмæй Президент сфидар кодта университеты кусджыты иумæйаг конференцийы уынаффæ — уыдон 6 июлы Тедейы-фырты ногæй радон æмгъуыдмæ равзæрстой университеты ректорæй. Тедеты Вадим Хуссар Ирыстоны паддзахадон университеты ректорæй кусы 2013 азæй фæстæмæ.
Иннæ Указæй Хуссар Ирыстоны Президент республикæйы хъахъхъæнынады министрæй сфидар кодта Гасситы Ибрагимы (зындгонд куыд у, афтæмæй Гассийы-фырт 2017 азы апрелæй фæстæмæ æххæст кодта министры хæстæ).
Æмгуыстады бадзырд бафыстой
Ацы бонты Республикæ Хуссар Ирыстоны кусæг балцы уыдысты Донецкы Адæмон Республикæйы минæвæрттæ.
Фысымтæ æмæ уазджытæн цы фембæлдтытæ уыд, уыдонæй иу рæстæг æмгуыстады бадзырд бафыстой Хуссар Ирыстон æмæ Донецкы Адæмон Республикæйы Базарадон-промышленнон палатæты разамонджытæ.
Документы сæ къухтæ бавæрдтой Æлборты Алан æмæ Валерия Булыга.
Бадзырд бафыссыны фæстæ Æлборты Алан куыд фæнысан кодта, афтæмæй йæ зæрдæ дары, дыууæ республикæйы æнгомдæр ахастдзинæдтæ æмæ экономикон бастдзинæдты райрæзтæн документ ахъаз кæй уыдзæн, ууыл. Йемæ æмхъуыды уыд Валерия Булыга дæр. «Хуссар Ирыстоны фыццаг хатт дæн. Дисы мæ бафтыдтой уæ адæм, уæ алæмæты æрдз. Абон цы бадзырд бафыстам, уый нын дарддæры æмгуыстадæн хорз фадæттæ аразы æмæ нæ æппæт мадзæлттæ дæр саразын хъæуы, цæмæй дыууæ республикæйы базарадон ахастдзинæдтæ фæхъомысджындæр уой», — бафиппайдта Валерия Булыга.
