Уӕрӕсейы Нациты хъуыддӕгты фӕдыл федералон агентады хъӕппӕрисӕй арӕзт цӕуы къамты дыккӕгӕм дунеон конкурс «Русская цивилизация».
Нациты хъуыддӕгты фӕдыл агентады разамонӕг Игорь Баринов куыд радзырдта, афтӕмӕй фыццаг ахӕм конкурс арӕзт ӕрцыд фарон. Уӕд сӕ цымыдисаг куыстытӕ конкурсмӕ ӕрбарвыстой 2 мин авторы 28 бӕстӕйӕ. Конкурсы ӕдӕппӕт ӕвдыст цыд 10 мин къамӕй фылдӕр. «Мӕ зӕрдӕ дарын, ацы аз конкурсы архайджыты нымӕц ноджы фылдӕр кӕй уыдзӕн, ууыл», — фӕнысан кодта Игорь Баринов.
Конкурсы оргкомитеты минӕвары ныхасмӕ гӕсгӕ, 23 июлӕй фӕстӕмӕ къамисджытӕн фадат ис сӕ куыстытӕ сӕрмагонд сайтыл равӕрынӕн. Уыимӕ, алы авторӕн дӕр ис конкурсмӕ 5 куысты бӕрц бадӕттыны фадат. Конкурсы номинацитӕ сты ахӕм: «Уникальная природа», «Лица и поколения», «Традиции большой страны», «Архитектура и скульптура» ӕмӕ «Народное творчество».
Сфӕлдыстадон ерысы уӕлахиздзаутӕ сбӕрӕг уыдзысты сентябры. Конкурсон жюрийы уӕнгтӕ сты зындгонд уӕрӕсейаг ӕмӕ фӕсарӕйнаг къамисджытӕ, нывгӕнджытӕ, журналисттӕ ӕмӕ ӕхсӕнадон архайджытӕ. Конкурсы уӕлахиздзаутӕ ӕмӕ лауреатты куыстытӕ фӕззӕджы ӕвдыст ӕрцӕудзысты Мӕскуыйы.
Конкурсы тыххӕй бӕстондӕр базонӕн ис йӕ официалон сайты: www.ruscivilization.ru.
Нӕ уацхӕссӕг
