Астæуккаг профессионалон ахуырад у, нæ бæстæйы куыстадон æмæ социалон къабæзтæн, сервисон архайдæн кусджытæ чи цæттæ кæны, ахæм системæ.
Уыцы системæйы ахъаззаг цæгтæй иу у Дзæуджыхъæуы базарадон-экономикон техникум. Ам ис хорз педагогон æмæ техникон фæрæзтæ, стæй хъæугæ дæснытæ куыстады алы къабæзты. Ахæм æмвæзады дæснытæ ахсынц нæ бæстæйы æнæвдæлон цæрджыты æртыккаг хайы бæрц.
Техникумы кусджытæ хорз æмбарынц, æхсæнады царды ног уавæрты, ахадгæ базарадон экономикæйы дуджы рауагъдонтæн ахсджиаг у хъæугæ зонындзинæдтæ райсын. Æрмæстдæр ахæм ахаст ахъаз у рауагъдонтæн куысты бынæттæ ссарынæн. Уымæн та хорз æххуыс у куыстуæттæ-партнертимæ иугæндзон æмгуыстад кæнын. Цæмæй ахуырдзаутæм практикон цæттæдзинад уа, уый тыххæй техникум æмархайд кæны куыстуæттæ «Премьер-Кпрю», «Базарадон хæдзар «Бавари», «Омега» («Деликат»), «Меркада», П.Д. «Дзæуджыхъæу» («Магнит»), «Базарадонпромышленнон куыстуат №1, «Гастроном», «Базарадон хæдзар «Закарпатье», «Мæскуы» æмæ æндæртимæ. Уымæ гæсгæ, дызæрдыггаг нæу, техникум кæй у æппæты егъаудæр астæуккаг профессионалон ахуырады уагдон республикæйы, ахуыр дзы кæны 1000 студентæй фылдæр.
Техникум цæттæ кæны менеджменты тæккæ дæсныдæр специалистты барадхъахъхъæнынады, æхсæнадон хæлцады, базарад æмæ фæлхасгæнæн товарты хæрзхъæддзинады экспертизæ куыстады бирæвæрсыг исбонады хызты. Æппæт уыцы дæсныйæдты кусджытæ уагъд цæуынц нырыккон базарады домæнтæм гæсгæ. Зын ссарæн у нæ республикæйы иу ахæм куыстуат, ацы техникумы рауагъдонтæ кæм нæ кусынц. Бирæтæ дзы æнтыстджынæй кусынц Мæскуыйы, Санкт-Петербурджы, Краснодары æмæ нæ бæстæйы æндæр горæтты. Уæлдай æнтыстджынæй рауагъдонтæ сæхи равдыстой Сочийы зымæгон Олимпиадæйы. Уырдыгæй райстой дæсгай арфæтæ куыстдæтджытæй. Бирæтæ дзы баззадысты уым кусгæйæ.
Дарддæр ахуыр кæнын кæй фæнды, уыдонæн техникум у иттæг хорз æхсойæн. Зæрдиагæй сæ исынц Мæскуыйы хойраджы паддзахадон университетмæ. Уыимæ техникумæн ис фидар бастдзинæдтæ. Техникумы рауагъдонтæ дарддæр ахуыр кæнынмæ бацæуынц СанктПетербурджы, Екатеринбурджы, Дзæуджыхъæуы æмæ нæ бæстæйы æндæр горæтты уæлдæр ахуыргæнæндæттæм. Техникумы студенттæ кæнынц æнтыстджын наукон æмæ сфæлдыстадон куыст. Бирæ хæттыты систы æппæтуæрæсеон, республикон олимпиадæты, æркастытæ æмæ конкурсты призертæ.
Техникумы ныффидар Джеоргуыбайы, Цæрвкъахæны æмæ Куадзæны бæрæгбæтты конкурстæ кæнын. Хуынд адæмы æхсæн вæййынц РЦИ-Аланийы Сæргълæууæджы администрацийы, РЦИ-Аланийы Ахуырад æмæ наукæйы министрады, РЦИ-Аланийы Национ ахастдзинæдты фарстаты фæдыл министрады, «Стыр Ныхас»-ы минæвæрттæ, Æхсæнадон палатæйы уæнгтæ.
Ахуырадон уагдоны архайд ирддæрæй райхæлд йæ ныры директор, Уæрæсейы хæринаггæнджыты ассоциацийы уæнг Æбиты Валерийы æрбацыдимæ. Дæсны педагогы зæрдиаг архайды фæрцы фидар кæнынц техникумы бастдзинæдтæ Сочийы, Мæскуыйы, Санкт-Петербурджы куыстуæттимæ. Уым студенттæ ацæуынц куыстадон ахуыртæ, ссарынц дзы куысты бынæттæ. Валери канд ахуырадон фарстатыл нæ тыхсы, фæлæ ма йæ педагогон коллектив æмæ студенттæн æнкъары сæ тыхст, цин кæны се сгуыхтдзинæдтыл.
Астæуккаг профессионалон ахуырады зæронддæр уагдон Дзæуджыхъæуы базарадон-экономикон техникум кæд рагон у, уæддæр удæй у æрыгон, уымæн æмæ ахуырадон системæйы рæстæгимæ æмдзу кæны.
АБАЙТЫ Эдуард
