Дзæуджыхъæуы префектурæты специалисттæ дарддæр рейдтæ аразынц горæты уынгты санитарон уавæр сбæлвырд кæныны нысанимæ. Уый тыххæй хъусын кæны Дзæуджыхъæуы администрацийы пресс-службæ.
Пресс-службæйы минæвары ныхасмæ гæсгæ, санитарон цæстдарды рейдтæ арæзт цæуынц æрвылбон дæр.
Фæстаг рæстæг бирæ ныхас цæуы санитарон сыгъдæгдзинад æмæ фæлгонцады фарстатыл. Фæлæ, рæстæг куыд æвдисы, афтæмæй алкæцы адæймаг йæ райгуырæн горæты сыгъдæгдзинадыл нæ хъуыды кæны. Уыцы адæмыл, кæй зæгъын æй хъæуы, рæсугъд ныхæстæ æмæ сидтытæ уыйбæрц ницы сахаддзысты. Æвæццæгæн, бамбардзысты æрмæстдæр Административон кодексы «æвзаг». Уый афтæ кæй у, уымæн та æвдисæн сты рейдон бригадты æрмæджытæ — æрмæст иу бонмæ алыхуызон санитарон æгъдаухæлдтыты фæдыл рафыстой 40 протоколæй фылдæр.
Æмæ æрмæст УФ-йы Административон кодекс не ‘вæры уыцы иварты фæтк, фæлæ фарстайы фæдыл бæлвырд уагæвæрдтæ ис Цæгат Ирыстоны «иуæй-иу æгъдаухæлдтыты фæдыл административон бæрнондзинады тыххæй» закъоны дæр. Афтæ, санитарон сыгъдæгдзинады уагæвæрдтæ чи хала, уыцы адæм хъуамæ цæуой иваргонд 1—2 мин сомæй. Ахæм æгъдаухæлдтыты фæдыл организациты разамонджытыл ивартæ æвæрд цæуы 3-5 мин сомæй, юридикон организацитыл та — 10—15 мин сомæй.
Нæ уацхæссæг
