Цæгат Ирыстоны Е.Вахтанговы номыл Уырыссаг академион театры аивадон разамонæг Владимир УВАРОВ куыд фехъусын кодта, афтæмæй федералон программæ «Большие гастроли»-мæ гæсгæ театр Курскы А. Пушкины номыл æмæ Белгороды М.Щепкины номыл драмон театртимæ сараздзæн «ивæн» гастролтæ.
— 1-7 сентябры Дзæуджыхъæуы чи уыдзæн, уыцы курскаг артисттæ нын равдисдзысты цыппар спектаклы — «Дикарь», «Номер 13», «Ктуба» æмæ «День рождения кота Леопольда». Курскæгты фæстæ нæм æрбацæуинаг белгородаг артисттæ нын 23-29 сентябры равдисынмæ хъавынц театралон уацмыстæ «Касатка», «Любовь и голуби», «Куклы» æмæ «Карлик Нос». Дыууæ театры дæр кусынц дæсны артисттæ. Дзуаппон уагæй мах ацæудзыстæм нæ уазджытæм. Александр Островский, Жан Ануй, Григорий Горин, Френсис Вебер æмæ Владимир Орлов кæй автортæ сты, уыцы спектакльтæ «Лес», «Бал воров», «Кин IV», «Зануда» æмæ «Золотой цыпленок» раздæр равдисдзыстæм Курскы, фæстæдæр та — Белгороды. Сентябры кæрон æмæ октябры райдайæны нæ зæрды ис, Сомихы æмæ Махачкалайы цы дунеон фестивалтæ уыдзæн, уым архайын. Актерты сфæлдыстадон рæзтæн ахъазгæнæг гастролон балцытæн ис стыр ахадындзинад. Æндæр регионы аивадуарзæджы хъуыды нымаинаг у, — загъта В. Уваров.
Уæрæсейы иумæйаг театралон тыгъдады рæзтæн ахъаз кæнгæйæ, федералон программæ «Большие гастроли» æххæссы æппæт бæстæйыл.
