Цæгат Ирыстоны Сæргълæууæг БИТАРТЫ Вячеславæн радон фембæлд уыд республикæйы цæрджыты къордимæ. Сывæллæтты æдасдзинад, амалхъомадæн æххуыс, хъæууон фæндæгтæ — ацы æмæ æндæр ахсджиаг фарстатæм аздæхтой адæм республикæйы разамонæджы æргом.
Зæгъæм, Дигорайы цæрæг Зуймонты Сослан радзырдта, йæ амалхъомадон архайд ын цы къуылымпы кæны, уыцы æууæлты тыххæй.
Сосланы ныхасмæ гæсгæ, йе ‘фсымæримæ ныр фондз азы кæнынц халсарты куыст. Сæ 400-метрон хъæрмуæтты æрзайы джитъритæ æмæ пъамидорты хорз тыллæг. Æфсымæрты фæнды сæ куыстуат фæуæрæхдæр кæнын. Уыцы нысанимæ курдиат балæвæрдтой Хъæууон хæдзарад æмæ хойраджы министрадмæ, цæмæй сын сæрмагонд субсиди радих кæной.
— Ахæм грант райсыны фæдыл конкурсы дæр архайдтам. Фæлæ нын куыд бамбарын кодтой, афтæмæй ахæм субсидитæ дæттынц æрмæстдæр хъæууон цæрджытæн, Дигора та, дам, горæт у. Куысты фæлтæрддзинад нæм ис, продукцийы рауагъд фæфылдæр кæныны пълантæ дæр снысан кодтам. Хъæуы нæ æххуыс æрмæстдæр субсидитæ райсыны хъуыддаджы, — радзырдта Зуймоны-фырт.
Ацы лыггæнинаг фарстамæ æркæсын Битарты Вячеслав бахæс кодта республикæйы Экономикон рæзты министрад æмæ Рæзты агентады бæрнон кусджытæн. «Бацархайдзыстæм, цæмæй паддзахадон субсидитæй дæуæн дæр фæхай кæной. Уыимæ, дæ дарддæры архайды æнгом æмгуыстад кæн министрад æмæ агентады специалисттимæ — уыдоны амынддзинæдтæ дын æнæмæнг æххуыс уыдзысты амалхъомадон куысты», — Зуймоныфыртмæ дзургæйæ, фæнысан кодта Цæгат Ирыстоны Сæргълæууæг.
Алагиры 3-æм скъолайы райдайæн кълæсты ахуыргæнæг Кцойты Мæдинæ та республикæйы разамонæгмæ бахатыд, цæмæй профилон ведомствотæн бахæс кæна ахуыргæнæндонмæ бацæуæнты æвæрд светофортæ ногтæй раивыны хъуыддаг. Мæдинæйы ныхасмæ гæсгæ, светофорты техникон уавæр абоны домæнты аккаг нал у, уыцы æууæл скъоладзаутæ æмæ сæ ахуыргæнджыты æдасдзинадæн ахъаз нæу.
— Æрмæст Алагиры нæ, фæлæ æппæт районты администрацитæ дæр хъуамæ æппæт æмбæлгæ мадзæлттæ саразой, цæмæй 1 сентябрмæ æппæт ахуыргæнæндæтты бацæуæнты æвæрд светофортæ æмæ æндæр техникон фæрæзтæ æнаипп куыст кæной, — йæ дзуаппы фæнысан кодта Битарты Вячеслав.
Æрыдоны цæрæг Мыстулаты Алыксандр республикæйы разамонæгæн арфæ ракодта, районы Центрон рынчындоны цалцæджы хъуыддагыл зæрдиагæй кæй архайы, уый тыххæй. Уыимæ, Мыстулайы-фырты ныхасмæ гæсгæ, банывыл кæнинаг у рынчындон æмæ 3-æм скъолайы ‘хсæн фæндаг.
Æрыдоны минæвармæ лæмбынæг байхъусгæйæ, Битарты Вячеслав куыд загъта, афтæмæй рынчындоны цалцæг куы ахицæн уа, уæд сæрмагонд службæты минæвæрттæ фæндæгтæм базилдзысты.
Республикæйы Сæргълæууæг æркаст иннæ адæмы курдиæттæм дæр. «Алкæцы курдиат æмæ лыггæнинаг фарстамæ дæр хъæуы бæстон цæстдард. Бынæттон хиуынаффæйады оргæнтæ дæр хъуамæ лæмбынæг сæ цæст дарой адæмы фæндæттæ æмæ хъæстытæм», — фембæлдæн хатдзæгтæ кæнгæйæ, загъта Битарты Вячеслав.
Нæ уацхæссæг
